Si Archbishop Jose Palma miawhag sa mga Katolikong Kristiyanos sa paghimo’ng prayoridad sa pagpamalandong kay sa paglingawlingaw. Iyang giluwatan ang pamahayag atol sa iyang wali sa misa sa Palm Sunday sa Cebu Metropolitan Cathedral sa Dominggo.
Haom kaayo ang pamahayag ni Palma ning pagsugod na sa Semana Santa, kanus-a kadaghan sa mga Katoliko ug bisan kadtong dili, mamakasyon sa lagyo nga mga dapit, kadaghanan sa mga resort aron mo-relax gikan sa trabaho ug negusyo kay taas man ang holiday.
Maanindot man tuod ibakasyon ug i-relax, apan isip Kristiyanos angay usab hinumdoman ang kabalaan sa tibuok semana, labina sa magsunod nga upat ka mga adlaw, gikan sa Huwebes Santo ngadto sa Dominggo sa Pagkabanhaw.
Mahimo man nga magdungan ang paglulinghayaw sa bakasyon ug ang pag-apil sa relihiyusong mga kalihukan.
Busa, maanindot kon ang dapit nga bakasyunan duol o dunay kasakyan padulong sa simbahan alang sa pag-ampo, pagpamalandong ug pagsalmot sa relihiyuso nga mga kalihukan.
Di lang lunlon lulinghayaw ug pag-relax sulod sa mga resort ang buhaton tungod kay ang pag-apil sa mga relihiyusong kalihukan di lang magpagaan ug maglimpyo sa huna-huna, kon di, magbusog usab sa espirito nga uhaw niini tungod kay kadaghanan kanato busy sa mga trabaho ug kon duna may bakante, naa nag-apong sa tagsa ka gadget.
Lahi ra baya ang imong bation sa pagpamalandong ug pag-apil sa mga relihiyusong kalihukan atol ning kasaulogan sa Semana Santa. Mas mogaan pa ang imong bation kay sa igo ka lang nagbakasyon aron mahilayo sa ka saba sa siyudad ug kalapoy sa sige og trabaho.
Di usab hingpit gani ang maangkon nga kahilum daplin sa kabaybayunan tungod kay mangdagsa usab ang libuan ka mga tawo nga sama kanimo, gusto usab mo-relax. Saba gihapon, di ba?
Apan apila ang pagbusog sa imong kalag, di ba imong masinati ug mabati ang mas gaan nga feeling kay duha ang imong nahimo,ang pag-relax sa huna-huna ug pagbusog sa imong espirito.