Editoryal: ‘Balaang’ bahandi sa kabilin

EDITORYAL
EDITORYAL

Taudtaod na ang problema bahin sa karaang mga butang. Mahal ang bili niini sa mga antique collector ug museum.

Apan ang mga butang sa simbahan, labi na sa mga imahen, giisip nga balaan kay nagsilbi nga simbolo sa pagsangyaw sa pagtuo.

Di sama sa ubang butang. Way katugbang kini nga presyo tungod sa iyang papel sa pagpalig-on sa mga deboto sa simbahan.

Ang Romano Katoliko maoy unang Kristiyano nga simbahan sa nasod dala sa kolonyalista’ng Espanyol sa Sugbo niadtong 1521.

Ang pagtuo nga Kristiyanismo nilipang, dili lang ang mayoriya nga Katoliko, lakip sa ubang Kristiyano nga sekta.

Hinuon sa pagkakaron, ang ubang Kristiyano nga grupo sa nasod dunay dako’ng impluwensiya gikan sa kasadpan nga relihiyusong organisasyon.

Apan ang Romano Katoliko maoy nagkupot sa mga karaan ug balaan nga mga bahandi sa kabilin isip labing una nga simbahan sa nasod.

Mao nga ang Simbahang Katoliko kanunay biktima sa pagkawat (dunay pagduda nga basin inside job ang ubang kaso).

Ug usa sa mga biktima mao ang usa sa labing karaang simbahan sa nasod, ang Archdiocesan Shrine of Patrocinio de Maria Santissima sa lungsod sa Boljoon.

Dugay nang nangawala ang panels o butang nga dunay gikulit nga imahen sa mga santo ug bungbong sa pulpito ug napalgan dihang gidonar kini sa usa ka kolektor sa nasudnong museum.

Si Gob. Gwenddolyn Garcia maoy unang nialma nga mauli ang maong mga butang sa simbahan sa Sugbo.

Ang Archdiocese sa Sugbo, pinaagi ni Most Rev. Jose S. Palma, niluwat og pamahayag sa pag-uli sa maong butang sa parokya sa Boljoon.

Sumala sa Arsobispo, way record ang simbahan bahin sa pagdonar ug pagbaligya sa maong mga butang.

Maisip nga kini gikawat. Busa maayong masubay usab kon kinsa ang nagkuha, lakip sa tulubagon sa nagpalit niini.

Bililhon ang balaang bahandi sa kabilin. Krimen ang pagpasipala niini sa balaod sa tawo ug Kahitas-an.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph