Editoryal: Balik ang dinagkong mga tulis

EDITORYAL
EDITORYAL

Human nahunong ang dinagkong mga tulis, nga ang katapusan nahitabo niadtong 2019, mibalik na sab kini dinhi sa Sugbo.

Kagahapon, Sabado, giigo ang usa ka pawnshop sa dan Colon, sa labing minos unom ka mga tawo nga nagmotorsiklo nga giingong ningpaila pa nga mga sakop sa National Bureau of Investigation (NBI).

Gihurot og dala ang tanang mga alahas nga naka-display sa ahensya. Paspas kaayo ang panghitabo nga nakapa shock pa sa mga personnel.

Sa pasiunang pakisusi, Cebuano ang sinultihan ug armado og usa ka M203 grenade launcher ug M4, mga armas nga military ug ubang personnel sa mga law enforcement agency ang naa lang niini.

Nagkahulogan usab ni nga giplano ug gigastuhan og dako ang pagtulis. Hayan nagtigom og dakong pundo alang sa elek­syon sa 2025. Di ni ordinaryo nga mga tulisan. Sa pasiunang nasayran, mga taga Mindanao ang nanulis.

Ning mga hitabo sa mga tulis, pagpatay ug mga aksidente sa trapiko, dako kaayo og papel ang pagtaud og CCTV sa pagsubay aron masulbad ang mga krimen, labina kon high definition ang mga camera nga gigamit.

Pinaagi gani sa CCTV, nakita ang mga tulisan nga armado og tag-as nga mga armas, kalma, wa mangaratol o way kahadlok sa pagtulis. Kana nagpasabot nga di sila bag-o ning buhata.

Naandan na sab nga ang mangigo sagad dinhi mga tulisan sa Mindanao.

Busa, maayo unta kon dunay hugot nga intelligence sharing ang kapulisan ug law enforcement agencies sa Sugbo ug Mindanao. Kay sagad aning mga tulisan sa Mindanao ilado na sa mga awtoridad.

Ang uban gani sa barko pa lang o sa airport, napanid-an na sila kay ilado na nga mangigoay.

Alang sa kapulisan, lain na sab ni nga sagpa kanila kay bag-o ra sila nga niingon nga wa silay na-monitor nga mga hulga, sama sa tulis.

Niini, makita nga dunay intelligence failure kay wa nabantayan ang pagsulod sa mga tulisan sa Sugbo.

Hinaot pa usab nga sama sa dako nga tulis sa usa ka pawnshop sulod sa usa ka mall niadtong 2019, masikop gilayon ang mga tulisan kay kon di madakpan, mobalik kini ug modasig pa ubang mga grupo sa mga tulisan sa pag-igo dinhi sa Sugbo.

Masukod usab dinhi ang abilidad sa pagresponde og krimen sa kapulisan karon. Masukod usab ang intelligence gathering ug abilidad sa pagtubag og dagkong mga krimen, sama sa tulis.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph