Nihulga ang Land Transportation Franchising and Regulatory Board (LTFRB 7) nga sakmiton ang mga traditional PUJ nga di consolidated ubos sa modernization program sa public transport sa nasod. Dakpon usab ang mga drayber niini kay maisip na nga kolurom ang mao nga mga sakyanan nga ilang gimaneho.
Ang mga traditional PUJ nga nasulod na sa consolidation di maapil niini kay gihatagan sila og kapin sa duha ka mga tuig sa pagproseso sa mga gikinahanglan alang sa modernisasyon.
Usa sa mga reklamo sa mga operator ug driver mao ang kamahal sa mga unit nga di mominos og P2 milyunes matag usa. Magsangkiig sila sa balayranan matag buwan bisan kon moabag pa ang kagamhanan sa pagbayad sa tipik sa ilang utangon matag tuig. Kinsa bay di magsangkiig nianang P2 milyunes matag unit?
Apan duna may nagtanyag og mas barato matag unit nga Filipino manufacturer nga mao ang Francisco Motors. Ilang gibasol mismo ang LTFRB nga maoy nakalangay sa modernisasyon mismo kay sila nitanyag gani og libreng unit sa modern PUJ isip pilot project.
Hayan duna pay lain nga mga kompaniya nga makatanyag o kaha makagama og barato nga unit kay sa langyaw nga brands. Bisan tan-awon pa karon ang mga garahianan sa mga transport coop, daghan sa ilang mga unit ang nakatambay. Wa nila padagana tungod kay mas alkanse sila kon padaganon kay wa may hapit sulod nga pasahero kon di rush hours.
Kon way income ang unit matag adlaw, unsaon man pagbayad sa kooperatiba sa ilang utang? Apan kon makakita og barato nga unit ang mga kooperatiba, sama sa gitanyag sa Francisco Motors, hayan mas maengganyo ang nahabilin nga 10 porsyento sa transport sector nga wa moapil sa programa tungod sa ilang mga kabalaka.
Masulbad tingali ang suliran kon mahatagan og solusyon ang mulo sa pipila ka mga drayber ug operator kon duna nay matanyag ug magamit nga barato nga unit.