Editoryal: Barug katumbahon na?

Editoryal: Barug katumbahon na?
Editorial Cartoon by John Montecillo

Ning nakalabay nga pipila ka mga semana, nagkaklaro ang kasilo ug kasagmuyo ni suspended Mayor Michael Rama sa iyang kaubanan sa Barug, labina kang Acting Mayor Raymond Alvin Garcia. Iyang gihulagway ang mga gihimo sa acting mayor nga nasukwahi sa iyang mga lakang.

Hayan iyang gipasabot ang pagpakigsulti ni Garcia sa kadagkuan sa Cebu Port Authority (CPA) ug Metropolitan Cebu Water District (MCWD). Apan wa pa bayay gihimo si Garcia aron balihon ang mga lakang ni Rama kay nakigsulti lang siya sa mga opisyal sa mao nga mga buhatan, gawas lang sa paghatag niini og permit sa water firm sa pagkawot alang sa pipe-laying.

Apan unsa may dautan niana kon ang tumong ang kaayuhan sa mga dapit nga nawad-an og supply sa tubig? Di ba?

Angay gani malipay si Rama sa gihimo karon ni Garcia sama sa paspas nga pagtrabaho sa Cebu City Sports Center (CCSC) nga iyang gipasirhan apan ang swimming pool ray nahuman human sa usa ka tuig.

Bitaw, ang pagliki sa relasyon ni Rama ug sa iyang kaubanan sa Barug nakita na man sa mga lakat sa legislation sa Konseho diin sila managlahi og baruganan, sama sa budget.

Si Konsehal Pastor Jun Alcover daan nang nasilo kang Rama kay wa siya paminawa sa iyang reklamo batok sa agriculture officer sa Siyudad nga iyang gihulagway nga way gihimo aron tabangan ang mga mag-uuma sa kabukiran sa siyudad nga nag-antos sa epekto sa El Niño.

Sa miaging adlaw, nipahibawo na si Alcover sa iyang pagbiya sa Barug ug mag-independente pa siya. Si Konsehal Renato “Junjun” Osmeña Jr. nipahibawo na sab sa iyang pagbiya sa Barug kay nakauyon siya sa pagpadagan ni Garcia sa Siyudad kay daghan ang nahimo sulod lang sa mubo nga panahon.

Ang ubang mga konsehal nagpabilin kang Rama, apan dunay lain nga naniid pa sa panahon. Mat-an pa sa pinya nga mga politiko.

Wa na bay dalan nga mahilot pa ang kasungian karon nila nga nagpadaku sa liki sa partido? Isip lider unta sa partido, nakigsulti ug maminaw si Rama sa iyang mga kauban. Mao ra ni ang yawe unta aron ang partido di matumba.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph