Ang pagpanghimakak ni Senate President Francis “Chiz” Escudero nga iyang gipanalipdan si Bise Presidente Sara Duterte batok sa impeachment gihulagway sa uban nga dili makatagbaw nga tubag.
Bisan pa man sa iyang taas nga kasinatian sa public service ug sa iyang giingong prinsipyo nga dili motugot nga ang kahadlok ang magbuot sa iyang mga desisyon.
Ang paglangay sa pagsugod sa impeachment trial nakapaisa sa kilay sa publiko dungan sa pangutana kon unsay motibo ug prayoridad sa Senado?
Ang iyang rason nga ang paglangan tungod sa pagpasiugda sa legislative agenda mahimong balido sa legal nga aspeto, apan gikan sa panan-aw sa demokrasya ug accountability, kini gikinahanglan nga susihon kon husto ba ang maong lakang.
“Magkaiba ang opinyon ng mga senador diyan…’Yang bagay na ‘yan, malamang pagbobotohan namin bago namin talakayin ‘yung impeachment kung saan malayang makakapagsalita at debate ang mga miyembro ng Senado kaugnay niyan,” mao kini ang tipik sa pamahayag ni Escudero.
Ang kalainan sa opinyon sa mga senador ug ang posibilidad nga mahimong “functionally dismissed” ang kaso tungod sa dili pa matapos sa wala pa ang petsa 30 sa Hunyo, naghulga sa integridad sa proseso sa impeachment nga usa unta ka mahinungdanong mekanismo sa check and balance sa gahum.
Busa, dili igo nga moingon si Escudero nga wala siya nanalipod kang Duterte tungod kay wala siya mahadlok. Ang pangutana mao: ang Senado ba naglihok isip institusyon nga motuman sa iyang konstitusyonal nga katungdanan bisan pa sa politikal nga implikasyon?
Sa konteksto nga sa gibug-aton sa mga alegasyon batok kang Duterte—lakip na ang korapsyon, malversation, ug uban pang pasangil—ang paglangan sa proseso sa Senado mahimong hubaron sa publiko nga porma sa proteksyon, bisan pa og dili kini maoy tuyo sa ilang lider.
Sa usa ka nasod nga nagpakabana sa pagpatuman sa balaod ug responsable nga pamunoan, ang pagserbisyo nga walay kahadlok kinahanglan adunay kabahin nga determinasyon sa pagtubag sa tanang matang sa pag-abuso sa gahum, dili lang pagpili kon si kinsa ang atubangon o talikdan.