Dili ikalimod nga naghatag og dakong kalipay sa yanong mga Pinoy ang saad sa administrasyon ni Presidente Ferdinand “Bongbong” Marcos Jr. nga mobaligya ang gobiyerno og bugas sa kantidad nga P20 kada kilo ubos sa programa nga “Bente Bigas, Meron Na!”
Sa plano, una kining pagahimuon sa tibuok Visayas ug gilusad ang programa sa Probinsya Sugbo sa niaging pipila ka mga semana.
Dihang naghinangat pa ang midterm elections sa nasod, nasugdan na kini pagbaligya sa Cebu Capitol ubos sa mando ni outgoing Governor Gwendolyn Garcia.
Apan gipahunong una kini Commission on Elections (Comelec) atol sa eleksyon aron dili kini magamit sa pamolitika. Sakto man sab ang Comelec.
Pagkahuman sa eleksyon, gibalik ni Garcia ang pagbaligya sa grabe ka barato nga bugas sa nagkadaiyang mga dapit sa probinsya ubos sa programang Sugbo Merkadong Barato. Nangalipay pagbalik ang yanong mga Sugboanon.
Nasugdan na sab kini pagbaligya sa ubang mga dapit sa Visayas ug sa ngadto-ngadto, ibaligya na kini lukop nasod.
Apan hangtod kanus-a kini mapahimuslan sa yanong mga Pinoy?
Kon ugkaton og maayo, kining maong programa ni Marcos madudahan nga usa ka lakang sa pamolitika kay gitunong kini dihang naghinangat pa ang eleksyon ug sa pagsugod pa lang, klaro na nga dili kini molahutay.
Si Governor-elect Pamela Baricuatro nipadayag og kabalaka kabahin ning maong programa.
Nagkanayon si Baricuatro nga kinahanglan pa niyang susihon kon aduna pa ba’y igong pundo ang Probinsya sa Sugbo alang sa pagpadayon ning maong programa apan dili pa kini niya mahimo hangtod nga dili pa siya opisyal nga makalingkod sa posisyon.
Si Baricuatro, kinsa nidagan sa niaging eleksyon ubos sa partidong PDP-Laban, niklaro nga kon iyang masuta nga aduna pa’y igong pundo ang probinsya, dili siya magmakuli nga ipadayon ang programa.
Apan kon iyang masuta nga wala na’y pundo ang probinsya, iyang ipahunong ang programa bisan supak sa iyang kabubut-on. Masabot nga dili gusto si Baricuatro nga palaumon ang iyang mga konstituwente.
Ning maong pamahayag ni Baricuatro, angayang ipaslak sa alimpatakan sa yanong mga Pinoy nga kining maong programa ni Marcos tataw nga lumabay lang apan angayang pahimuslan.