Sabado, Abril 27, 2024, karon ang ika-503 nga kasumaran sa labing una nga pakigbatok sa mga lumad sa nasod batok sa langyaw nga pagpanakop diin gipukan ni Datu Lapulapu ang lider sa mga Espanyol nga kolonyalista nga si Ferdinand Magellan.
Usa sa mga bililhon nga panid sa mabulukong kasaysayan sa Filipino nga dili nato angay hikalimtan. Si Lapulapu giisip nga labing unang nasudnong bayani taliwa sa pipila ka mga isyo sama sa wa pa naporma ang usa ka nasod nga Pilipinas niadtong panahuna.
Apan si Lapulapu, gawas sa iyang dakong papel sa kasaysayan, ang dugo nga naglatay sa atong lawas gikan sa lumadnong kaliwat nga naghiusa kanato sa pagbati ug pagpakigbisog nga maumol ang usa ka nasod nga gawasnon sa langyaw nga pagpanakop.
Ang kawsa ni Lapulapu nahimong inspirasyon sa nagsunod nga henerasyon sa pagpatunhay sa kaugalingon sa kaliwat hangtod ning modernong panahon nga nag-atubang kita sa laing hagit sa matang ug dagway sa pagpanakop.
Busa importante nga dili kita malimot sa atong kagikan ug ang paghimo og kalihukan sama sa kasaulogan nga dako og matabang nga magpabiling lab-as ang tanan sa atong panumdoman labina sa kasamtangang henerasyon.
Sumala ni Dr. Jose Rizal, gideklarar nga nasudnong bayani, “Ang hindi lumingon sa pinanggalingan ay hindi makararating sa paroroonan.” Kini nga panultion ni Rizal haom kaayo sa mga kasaulogan labina sa ika-503 nga Kadaugan sa Mactan.
Ug takos ang pagtambong sa kalihukan karon sa Lapu-Lapu City ni Presidente Ferdinand ‘Bongbong’ Marcos Jr. ug ubang taas nga mga opisyal sa nasudnong kagamhanan ug mga langyaw nga dumuduong sa reenacment sa away tali ni Lapulapu ug Magellan.
Nasayod kita nga hugot ang seguridad nga ipatuman sa Kagamhanan sa Dakbayan sa Lapu-Lapu tungod sa presensiya sa mga opisyal sa nasod nga gipangulohan ni Marcos Jr.
Manghinaot kita nga hapsay, malinawon ug malampuson ang laing tuig sa pagsaulog sa garbo sa mga Bisaya sa panid sa kasaysayan - ang Kadaugan sa Mactan.