Sa pagkasakop niadtong dul-an sa 100 ka mga baboy sa kadagatan sa lungsod sa Dumanjug, Cebu nga naggikan sa Lalawigan sa Negros, mahulagway nga insulto sa Probinsiya sa Sugbo taliwala sa Executive Order (EO) 16 nga giluwatan ni Cebu Governor Gwendolyn nga aduna gihapoy suway nga mipalusot.
Ang maong EO 16 nga giisyu sa gobernardor niadtong Oktubre 25, “Anti-Smuggling Inter-Agency Task Force” nga maoy gitahasan o motutok sa pagpakgang niadtong mopayuhot sa mga dili rehistrado nga kahayupan ug ubang kargamento nga hilom nga ipasulod sa Probinsiya sa Sugbo.
Ang presensya sa mga ‘undocumented’ nga mga baboy nga gikan sa Negros nakadugang lang og kabalaka sa pagkatap sa sakit sa hayupan ang African Swine Fever (ASF) nga posible nga makaapekto sa industriya sa baboy sa Cebu.
Kini adunay seryusong epekto alang sa lokal nga mga mag-uuma o hog raisers, mga konsumidor, ingon man sa kinatibuk-ang ekonomiya, tungod sa posibilidad nga mahimo’ng moresulta sa mga lakang sa pagpatay sa mga baboy, trade restrictions, ug taas nga presyo sa karne’ng baboy gumikan sa pagkunhod sa suplay.
Nagpakita ang isyu sa panginahanglan alang sa mas hugot nga pagpatuman sa mga regulasyon sa pagbiyahe taliwala sa mga isla lakip ang mga quarantine nga protocol ug mga kinahanglanon sa dokumentasyon alang sa mga hayop. Kinahanglan nga masiguro sa mga awtoridad nga ang mga baboy nga misulod sa Cebu nakatuman sa mga health ug safety standards sama sa mga veterinary certifications ug quarantine clearances. Dugang pa, kinahanglan adunay koordinasyon tali sa lokal nga kagamhanan sa Cebu ug Negros aron nga epektibo nga mabantayan ug makontrol ang pagpabiyahe sa mga hayop.
Ang pagsulbad sa problema lagmit nga magkinahanglan ug kombinasyon sa mga pagbag-o sa polisiya, pahugtan ang inspeksyon sa mga border lakip na ang kampanya nga nakatutok sa mga mag-uuma ug mga negosyante.
Ang pagpabag-o sa mga biosecurity measures ug ang pagpalig-on sa kooperasyon tali sa mga awtoridad sa probinsya makatabang sa pagminus sa mga risgo sa industriya sa baboy sa Cebu ug sa pagpanalipod sa panglawas sa publiko.