Editoryal: Bisan utok sa uk-ok nakasabot

EDITORYAL
EDITORYAL

Personal nga gisusi ni acting Cebu City Mayor Raymond Garcia ang Cebu City Sports Center (CCSC) niadtong Lunes, May 20, 2024, alang sa pag-host dakbayan sa Palarong Pambansa karong Hulyo 6-17, 2024, ug aduna siya’y nasuta – wala pa’y rubber nga nataod sa track oval.

Nitingkag tingali ang dunggan ni Garcia sa iyang nasayran ug nakapa­ngutana kini og dakong “NGANO?”

Ang CCSC gisirado sa publiko niadto pa’ng Mayo 18, 2023 alang sa renovation niini.

Kapin sa usa ka tuig na lang ang nakalabay, wala pa’y bag-ong rubberized track oval ang CCSC, nga mao man unta kini ang labing mahinungdanon.

Sa inisyal niyang pakisusi, nasayran ni Garcia nga ang rubber installation nagkinahanglan lang og 30 ka mga adlaw unya laing 30 ka mga adlaw ang curing process.

Apan dihang iyang gikahinabi ang project contractor, nasayran ni Garcia nga pito lang ka mga adlaw ang curing process.

Bisan tingali utok sa uk-ok, makasa­bot nga puwerteng pagkalangaya ang pagtrabaho sa rubberized track oval.

Gihangyo ni Garcia ang contractor nga mobisita sa iyang opisina aron mohatag og eksplinasyon nganong nalangan ang pagtaod og rubber sa track oval.

Kon makahatag na sa iyang rason ang contractor ngadto ni Garcia, tinga­li masabtan ra kini sa utok sa uk-ok.

Apan bisan unsa pa tingali ang irason sa contractor, dili gyud mawala sa alimpatakan ni Garcia ang pulong nga “langan.”

Si Cebu City Sports Commission chairman John Pages nipasalig nga mahuman ang rubberized track oval karong Hunyo 15, 2024, dul-an sa tulo ka mga semana sa dili pa magsugod ang Palarong Pambansa.

Labing seguro, nagsunod si Pages ning pagtrabaho sa rubberized track oval ug posibleng mahitabo ang iyang giingon.

Apan ang pangutana, maperpekto kaha ang pagtrabaho niini?

Kon simbako adunay sipyat sa pagtrabaho nga kinahanglang usbon, aduna pa kaha’y igong panahon aron matrabaho kini og insakto?

Dili kaha inig labay sa pipila lang ka mga buwan, maguba dayon ang bag-ong rubberized track oval? Pagkaanugon sa minilyon nga pundo nga gibubo alang niini.

Ambot lang gyud kaha. Ang segurado pa lang ning puntoha, nakasabot ang utok sa uk-ok sa pulong nga “langan.”

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph