Editoryal: Biyahe’ng wa makaabot sa destinasyon

Editoryal: Biyahe’ng wa makaabot sa destinasyon
Editorial Cartoon by John Montecillo

Mga pasahero nga regular nga mosakay og van-for-hire (V-hire) sa ilang mga lakaw nipadayag og kabalaka sa ilang kaluwasan human sa pagkabalitok sa V-hire samtang nagtungas sa viaduct sa Cebu -Cordova Link Express (CCLEX) sa Sabado sa alas 2:30 sa hapon, Mayo 4, 2024.

Ilabi na nga duha sa 23 ka mga pasahero nga sakay sa maong V-hire ang kompirmadong namatay.

Hinungdan sa disgrasya mao ang pagbuto sa ligid sa tuo nga luyo’ng bahin, hinungan nga wa makontrolar sa drayber ang manubela ilabi na nga bulhot kining mipadagan ug mibalitok ang sakyanan.

Ang V-hire usa sa alternative mode of public transportations sa nasod gawas sa traditional jeepneys, modern PUVs, taxis ug uban pa.

Daghang mga pasahero nga mopili sa pagsakay sa V-hire tungod kay enclosed busa likay sa abog, ug air conditioned.

Apan mitumaw ang pangutana kon nganong mibuto ang ligid sa maong V-hire?

Adunay miingon nga posible nga hilis na ang ligid sa gidugayon, overloaded sa sakay, tumang kainit sa panahon ug daghan pang mga opinion ug huna-huna ang nanggawas.

“Dili diay na paga-check upon sa mga drayber ilang unit?”

“Nag-apas ra sa kita, among among lang sa mga pasahero.”

Pipila lang kini sa mga yawyaw sa commuters sa usa ka terminal sa Sugbo.

Hinaot nga mahatagan og pagtagad sa hingtungdang ahensiya ang maong hitabo, hingusgan pa ang pagpatuman sa mga regulasyon sa maong transportasyon ingon man ang pagpahamtang sa tukmang silot aron magmatngon ang mga operator ug drayber.

Daghan ang nagsalig sa pagpamasada, ilabi kon mao kini’y ilang bread and butter nga panginabuhian nga angay nilang ampingan.

Dungan sa panghinaot nga di na masubli ang maong duguong aksidente sa kalsada.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph