Bisan kon wala siya modaug sa bag-ohay lang nahuman nga piniliay niadtong Lunes, Mayo 12, 2025, si Mayor Raymond Alvin Garcia mituman gyud sa iyang saad nga ihatag ang Charter Day bonus ngadto sa kapin 3 mil ka mga empleyado sa kagamhanan sa Dakbayan sa Sugbo human gilibkas sa Comelec ang election spending ban.
Matod ni Garcia niadtong Martes, Mayo 13, 2025, nga iya nang gimanduan ang City Administrator sa pagpadayon sa pagpagawas sa mga insentibo.
Hinuon, wala pa mahibaw-i ang engsaktong oras sa pag-release sa kwarta.
Ang bonus karong tuiga nagkantidad og P35 mil alang sa mga regular ug casual nga empleyado, P5 mil sa job order personnel.
Kini nalakip sa unang supplemental budget sa siyudad nga giaprobahan sa konseho niadtong Marso 26, 2025.
“Usually, the money is downloaded to their ATMs at night. I don’t know. I already instructed today, so I don’t know when it is possible to be released either tonight or tomorrow,” matod sa mayor niadtong Martes.
Ang Charter Day bonus ihatag sa mga empleyado agi og paghandom sa founding anniversary sa siyudad nga saulugon matag Pebrero 24.
Apan ang pagpatuman sa Comelec ban maoy nakalangan sa pag-release sa mga bonus nga niabot og hapit duha ka buwan sukad sa pag-aprobar sa budget.
Ang pag-aprobar sa budget natakdo sab sa pagsugod sa election period.
Ang election ban niepekto niadtong Marso 28 ug nilungtad hangtod sa adlaw sa eleksyon niadtong Lunes, Mayo 12.
Sa sayo pa, si Mayor Garcia nihangyo sa Comelec nga dili lang unta iapil sa election ban ang Charter Day bonus sa mga empleyado, apan wala gyud siya makadawat og reply gikan sa ahensiya.
Matod niya atol sa flag-raising ceremony atubangan sa City Hall niadtong Abril 21, nga ang pagkalangay sa pagtubag posibleng tungod sa daghang holidays nga nangagi.
“Because it was a long weekend, that’s why tingale nga wala mahatagan og action dayon. But hoping this week, ma-actionan dayon para ma-release na nato,” sumala sa mayor.
Ang long weekend nga gipasabot ni Garcia mao ang Semana Santa diin walay trabaho ang mga buhatan sa gobiyerno, ingon man mga pribadong kompanya atol sa Holy Thursday ug Good Friday, isip pag-obserbar sa tinuig nga tradisyon.
Atol sa eleksyon sa pagka mayor, si Mayor Garcia nakakuha lang og 176,967 ka botos, samtang ang iyang kontra nga si Nestor Archival nga dugay nang konsehal sa siyudad, nakalangkat og 256,197 ka botos.