Editoryal: Brake na say gibasol

Editoryal: Brake na say gibasol

Lain na sab nga kinabuhi ang nakalas human daruha sa usa ka trak nga nagkarga og mga manok sa N. Bacalso Ave. sa lungsod sa Minglanilla. Matod sa mga saksi nga naghaguros sa pagpadagan ang drayber sa trak hangtod nga nawad-an og kontrol kay wa na mo-function ang brake.

Mao lagi na, dali kaayo nga nakabasol sa brake ang bisan kinsa nga drayber. Natural di na mo-function ang brake tungod kay sobra na kini sa iyang kapasidad. Sagad sobra kakusog ang dagan ug kabug-aton sa sakyanan. Pun-an pa kon di maayo og kondisyon ang brake system.

Mao ni ang rason kon nganong dunay speed limit nga gi-set ang The Land Transportation and Traffic Code. Magkabug-at ang sakyanan, magkaubos ang speed limit. Ngano man, magkabug-at ang sakyanan, mas lisod kining pahunungon. Wa pay labot ang epekto sa lawas niini sa momentum sa dagan.

Sumala gud, kon mo-brake ang dako nga sakyanan, sama sa trailer truck, di ba mo-sked ug mobabag sa karsada, kana kon di man molahos sa daplin ug matumba? Apan diri sa atoa, ang mga drayber sa dagko nga mga sakyanan mao hinuoy kusog kaayo nga makapadagan. Maoy mga garaon kaayo nga makapadagan sa ilang gimaneho nga sakyanan.

Sa kaso sa bangga kagahapon, gihulagway sa mga saksi nga naghaguros ang dagan sa trak, apan matod sa drayber ug pahinante, ang trak nikalit lang sa pagsutoy og dagan. Katuohan ba?

Panahon na karon nga anam-anamon sa Dept. of Transportation (DOTr) ang pagpamalit ug pagpanaud og mga sensor nga mobasa sa speed limit nga magpakita sa tukmang gikusgon sa mga sakyanan aron masilutan kining mga drayber sa mga karsada nga makapadagan nga ingon sa naa sila sa racetrack.

Kay kon di kini sila mabadlong sa ilang way poas nga pagpasagad sa kadalanan, daghan pang mga kinabuhi nga makalas ug maangol sa mga aksidente sa kadalanan. Luoy kaayo ang brake kay maoy pirme pasanginlan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph