Dili maayong tilimad-on ang brutal nga pagpusil-patay sa usa ka brodkaster atol mismo sa iyang programa sa radyo sa lungsod sa Calamba, Misamis Occidental sa Dominggo, Nobiyembre, alas 5:35 sa buntag.
Si Juan Jumalon, 57, gisulod sa bugtong mamumuno sa booth sa iyang radio station, 94.7 Calamba Gold FM samtang nagpahigayon sa iyang programa. Gideklarar siya nga patay sa pag-abot sa Calamba District Hospital.
Wa matino sa taho sa kapulisan bahin sa mamumuno ug motibo sa krimen. Nagpadayon ang ilang imbestigasyon sa naasoy nga kaso nga nakapakurat sa iyang tigpaminaw ug tumatan-aw sa live broadcast, kinsa linawas nga nakasaksi sa brutal nga pagpatay.
Gani, nag-viral dayon sa social media ang video sa pagpusil-patay sa brodkaster. Niani kini og daghang reaksiyon sa netizens. Daghang hugonhugon ug pag-awhag sa awtoridad sa pagpaspas sa ilang imbestigasyon.
Dili nato direktang malambigit kini sa pagkakaron, apan nahitabo kini unom ka adlaw gikan sa Barangay and Sangguniang Kabataan Elections (BSKE) sa Oktubre 30, 2023. Nasayod kita nga dunay ubang dapit nga mainiton ug higpit ang panag-atbang sa eleksiyon sa barangay.
Kumusta kaha sa Calamba? Bisan unsang rason, ang pagkutlo sa kinabuhi sa tawo dili sakto nga pamaagi. Dunay hawanan, sama sa korte, alang sa paghusay ug hukom bahin sa kasilo o kasuko ubos sa organisadong katilingban.
Linuog nga batasan sa responsable ug posibling nagpaluyo o nagsugo sa pagpusil kang Jumalon. Wa kini luna sa kalibotan nga malinawong katawhan ug nagtahod sa kabalaan sa kinabuhi.
Ang Mindanao Independent Press Council Inc. (MIPCI) nipagawas og opisyal nga pamahayag sa ilang pagkasubo ug nikondenar sa brutal nga pagpatay kang Jumalon, inilang independent community radio broadcaster sa Calamba, Misamis Occ.
Risgo sa kinabuhi kaluha sa gawasnong pamahayag hinungdan nga palambuon ang hugot nga koordinasyon sa mga sakop sa media aron mas lig-on ang hiniusang pagbarog batok sa pagpanghulga.
Kinahanglan nga magpakabana kitang tanan aron dili maghari ang kalibotan sa kahadlok ug pagdaugdaog.