Editoryal: Bugalbugal sa Plea bargaining

Editoryal: Bugalbugal sa Plea bargaining
Editorial Cartoon by Ariel Itumay

Nihangyo si Lapu-Lapu City Mayor Junard "Ahong" Chan sa mga huwes ug piskal nga di na sayunsayunon ang pag-uyon sa plea bargain sa mga kaso sa illegal drugs human nakabantay ang mayor nga sagad sa nangalambigit sa dagkong mga krimen gikan na sa bilanggoan, nakagawas tungod sa mao nga legal procedure.

Usa sa mga biktima sa mao nga mga tawo mao ang iyang market officer nga gipusil patay niadtong Disyembre. Ang gunman ug drayber sa getaway nga motorsiklo pulos nakagawas tungod sa plea bargaining.

Wa lang kini nahitabo sa dakbayan sa Lapu-Lapu, apil na sa ubang mga dapit sa Metro Cebu. Kadaghanan sa mga durugista nagbalikbalik na sa bilanggoan, makagawas lang tungod sa plea bargain sa mga kaso. Di ba duna may mga kondisyon ang mao nga legal procedure?

Dunay punto ang mayor nga wa nakita sa ubang local chief executives. Nganong uyonan pa man ning mga repeat offender, nagsulod gawas sa prisuhan sa samang kaso? Kon gilapas nila ang mga kondisyon sa una ug ikaduha, unsa pa may garantiya nga di kini buhaton sa ikatulo ug makadaghan pa?

Di hatagan og luna kining mao nga mga tawo nga nagbugalbugal sa balaod kay namatud-an na man nga kini sila molapas gihapon. Angay gani nga maghimo og hiniusa nga database ang mga otoridad, sama sa kapulisan ug Philippine Drug Enforcement Agency (PDEA) aron ma-monitor ang ilang mga kalihukan.

Tahasan usab ang mga barangay sa pag-monitor kanila kay ang barangay officials ang dunay kapabilidad sa pagbantay niining mga durugista nga nakagawas. Sila usab ang gitahasan sa pagseguro nga kining mga tawhana nakatuman sa drug rehabilitation program.

Di lang tingali drug rehab, bantayan sab kon wa ba sila nibalik sa pagpamaligya og illegal drugs. Di lang baya sila ordinaryo nga drug user, reseller sab sila og ilegal nga drugas.

Pinaagi niini, lisod nang makagawas ang repeat offenders sa illegal drugs.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph