Editoryal: Buhis naapiki, nausik

Editoryal: Buhis naapiki, nausik
Editorial Cartoon by Ariel Itumay

Nahimong dakong isyo ang sayop nga bana-bana sa kinatibuk-ang ihap sa mga empleyado alang sa pagpatuman sa ‘rightsize’, sa mga empleyado sa Cebu City Hall.

Kini mosangko sa giingong dili na pag-renew sa trabaho sa labing minos 7,000 ka job order (JOs) employees ug kaswal.

Sa pakighinabi sa media niadtong Lunes, Enero 8, 2023, si Cebu City Administrator Collin Rosell niingon nga adunay dako’ng kasaypanan sa pagdeterminar sa tukmang gidaghanon sa mga empleyado sa City Hall.

Matod ni Rosell, ang Human Resource and Development Office (HRDO) unang nitaho nga labing minos 7,000 ang gidaghnon sa mga empleyado sa City Hall.

Apan ning ulahi, ang HRDO niusab sa ihap ngadto sa 10,000 ug, matod ni Rosell, posible nga labaw pa niini tungod sa padayong pagsusi sa talaan.

Dakong kwestiyon, nganong way tino nga listahan ang HRDO? Hinuon, kining kasaypanan gikan pa sa miaging administrasyon sa City Hall. Nasakpan kini tungod sa plano ni Mayor Michael Rama sa rightsizing o pagpakunhod sa mga kawani subay sa ilang saktong panginahanglan sa tahas sa buhatan ug kapasidad sa kawani.

Una nang namahayag ang mayor nga hinayhinay niya nga kunhoran ang maong gidaghanon ngadto sa tres mil na lang sulod sa iyang termino sa City Hall.

Busa sa ulahing ihap nga 10,000, dunay 7,000 ang gikatakda nga mataktak kon subayon ang plano sa mayor. Nganong niabot niini nga punto? Posible nga resulta kini sa political accommodation. Ang nakapaet kon dunay ‘ghost employees’. Kinsay nakabenepisyo sa ilang suweldo?

Kahinumdoman, ang mga kawani sa City Hall gihatagan og P25,000 nga Christmas bonus lakip sa kaswal ug P10,00 sa JOs. Dili diay kadto tukma sa ihap sa mga kawani? Importante ang papel sa HRDO sa pagdumala sa City Hall subay sa tukma nga listahan ug makanunayong pagsubay sa estado sa mga kawani.

Maayong manubag ang responsable niini. Ang buhis sa katawhan naapiki. Nausik tungod sa walay klaro nga listahan sa mga kawani.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph