Mosaka na unya ang cash aid sa mga senior citizen kon ugaling maaprubahan ang gisugyot ni Cebu City Councilor Sisinio Andales nga himuong P15 mil ang tinuig nga hinabang para sa mga edaran o P3,750 kada tulo ka buwan, gikan sa P12 mil.
Si Andales, nga usa usab ka senior citizen, nangatarungan nga dili na paigo ang kasamtangang kantidad aron makasabay sa pagsaka sa presyo sa mga nag-unang palitunon.
Ang panawagan ni Andales usa ka hangyo alang sa pagtahod, usa ka pag-ila sa mahinungdanong kontribusyon sa mga senior sa paglambo sa Sugbo.
Nagtuo siya nga ang pag-atiman sa siyudad sa mga edaran kinahanglang ipakita “dili lang sa pulong, apan labaw sa tanan, sa aksyon.”
“Let us make Cebu City government a city that cares—not only in word, but more importantly, in action,” matud sa konsehal.
Gihangyo ni Andales ang Office of Senior Citizens Affairs (OSCA) nga mangolekta og komprehensibo nga datus bahin sa demograpiya sa mga senior citizen ug sa gidaghanon sa kasamtangang mga benepisyaryo.
Apil sa iyang gipangayo ang usa ka report bahin sa posibleng epekto sa pinansyal sa gisugyot nga pag-umento.
Giawhag niya ang konseho nga hatagan dayon og aksyon ang maong sugyot, hilabi na pinaagi sa pagpasa og balaod nga motubag sa mga panginahanglanon sa mga senior citizen.
Ang mga sugyot ni Andales gipadala sa Committee on Budget and Finance ug Committee on Senior Citizens Affairs, nga motimbangtimbang sa posibleng mga benepisyo batok sa epekto sa panalapi.
Samtang lig-on ang emosyunal ug etikal nga mga argumento alang sa pagdugang sa ayuda, kinahanglan usab nga hunahunaon sa gobiyerno sa siyudad ang kapasidad niini sa panalapi.
Ang pangutana karon kon mosanong ba dayon ang siyudad sa mga gipanawagan ni Andales.
Makita ba nila kini isip usa ka gikinahanglang tabang aron maprotektahan ang dignidad sa mga senior citizen o mahimo ba kining laing sugyot nga mawala lang nga sama sa bula?
Para sa mga senior sa Cebu City, ang tubag mahimong makahimo og dako kaayong kalainan alang kanila.
Ang kasamtangan nga financial assistance program alang sa mga senior citizen gidumala sa City Ordinance No. 2453, nga giamendar sa Ordinance No. 2529.
Ubos sa maong ordinansa, ang mga kuwalipikadong senior citizen makadawat og P3 mil kada quarter o kinatibuk-ang P12 mil kada tuig.