Dul-an na sa duha ka dekada ug mokabat na sa P2 bilyunes ang nagasto sa katukoran sa bag-ong napulo ka andana nga edipisyo sa Cebu City Medical Center (CCMC) sa dan Panganiban eskina sa N. Bacalso Ave. sa Barangay Pahina Central.
Apan sa pagkakaron, ang ground floor ngadto sa ikatulong andana pa lang ang nagamit sa ospital bisan sa kadako na sa nagasto.
Nagtumaw usab ang daghang isyo nunot sa kalangay sa paghuman sa trabaho ug kakuwang sa pundo nga nahisama na kini sa pasyente nga nagtinga.
Nisamot karon nga si Mayor Michael Rama gipaubos sa preventive suspension sa Ombudsman sukad sa Mayo 10, 2024 tungod sa kaso nga gipasaka sa upat ka mga kawani sa City Hall.
Dili ba nangalap man si Rama og pundo nga giingong mokabat na og P1 ka bilyon gikan sa pribadong tinubdan alang sa CCMC?
Bisan wa pa maklaro ang ‘pledges’ ni Rama, si Cebu City Acting Mayor Raymond Alvin Garcia nipadayag nga ipadayon ang pagtrabaho sa CCMC gamit ang dili mominos P700 milyunes nga nahimong ‘savings’ dihang giputol ang kontrata sa unang kontraktor tungod sa kalangay niini.
Apan nialma si Konsehal Mary Ann Delos Santos atol sa iyang privilege speech sa regular session niadtong Miyerkules, Hunyo 26.
Niila siya sa maayong tinguha ni Garcia sa pagtapos sa edipisyo apan, nikuwestiyon sa dili sihag nga pagdumala sa pundo alang sa CCMC.
Busa giawhag niya si Garcia sa paghunong una sa paghimo og bidding tungod sa iyang kabalaka nga mosangpot sa samang sitwasyon nga walay klaro ug mausik ang salapi sa kagamhanan.
Ang pagtukod sa maong edispisyo nagsugod sa 2015 dihang ang orihinal nga CCMC building gidemolis human sa kusog nga linog sa 2013.
Matod ni Delos Santos, ang C.E. Padilla Construction Inc. (Cepci) maoy unang nidaog sa pagtukod sa first phase sa CCMC building sa kantidad nga P514.97 milyunes. Sa pagkaputol sa kontrata sa Cepci ug nisalo ang ubang kompaniya, tungod sa kalangay, dugang pundo ang gibubo hangtod nga niabot na og dul-an sa P2 bilyunes.
Dunay punto Delos Santos sa iyang agbabag apan laing kalangan na usab sa nagtinga sa ospital sa masa.