Kanus-a kaha maabli pagbalik ang Cebu City Sports Center? Usa kini ka dakong pangutana nga hangtod karon, nagpabilin sa alimpatakan sa mga mahiligon og dagan alang sa kapiskay sa panglawas.
Usa sab kini ka dakong pangutana sa track and field athletes nga nangandoy nga sa ugma damlag, makahatag og dakong dungog sa Pilipinas.
Ang ubang joggers ug athletes nakadesisyon nga magpasingot sa kilid na lang sa kadalanan. Pagkadelikado biya’g matapsingan og naghaguros nga sakyanan. Apan adunay mas dakong senaryo ug mas dakong pangutana nga angayang kabalak-an kabahin niini.
Maandam na ba kaha ang CCSC alang sa pag-host sa Dakbayan sa Sugbo sa Palarong Pambansa nga sugdan karong Hulyo 9, 2024?
Mga adlaw na lang ang giihap ug mag-usa na ka tuig gikan niadtong temporaryong gisirad-an sa gobiyerno sa Dakbayan sa Sugbo ang CCSC alang sa renovation niini apan hangtod karon, mura’g wala pa man tingali kini mahitsura hilabi na ang rubberized track oval nga maoy pahigayunan sa daghang events.
Basi sa orihinal nga plano, angay na untang nahuman ang renovation sa CCSC partikyular sa track oval ning panahuna gumikan kay mao kini ang pahigayunan sa Central Visayas Regional Athletic Association (CVIRAA) nga gikatakda karong Mayo 4-9, 2024.
Apan gumikan kay wala pa nahuman ang renovation sa track oval, nakadesisyon ang mga nagpasiugda sa CVIRAA nga sa Naga City Sports Complex sa City of Naga ipahigayon ang track and field events. Ang opening ug closing ceremonies sa CVIRAA dili na sab sa CCSC ipahigayon ug adto na kini sulod sa Cebu Coliseum.
Ang ilang rason, aron malikay ang estudyanteng mga atleta sa nagkaligiting nga kainit. Nadamay pa hinuon si Haring Adlaw.
Dili kaha maghuot ang gibanababang 10,000 ka mga atleta sa Cebu Coliseum, idugang pa ang mga tumatan-aw ug mga opisyal sa matag delegasyon? Mura’g ang klarong rason niini mao ang kamatuoran nga wala pa nahuman ang renovation sa CCSC.
Adunay hugonhugon nga palpak ang pagtrabaho sa track oval maong giusab kini pagtrabaho nga maoy nakalangay sa renovation niini.
Unsa man diay ning contractors nga gipangkuha sa Dakbayan sa Sugbo, dili diay hanas sa pagtrabaho niini?