Editoryal: CCTO napuno sa saway

EDITORYAL
EDITORYAL

Human sa makauuwaw nga paghuot sa trapiko sa Cebu South Coastal Road (CSCR) sa miaging semana, si Konsehal Rey Gealon nihangyo sa buhatan ni Mayor Michael Rama sa pagpalit og heavy tow truck. Naa man tuoy tow-truck ang Siyudad, apan gagmay nga mga sakyanan ray mabitad niini.

Nihangyo usab si Gealon sa executive department sa paghimo og mga protocol sa CSCR kon dunay samang insidente nga mahitabo sa mao nga karsada.

Gawas ani nga protocol, mas maayo kon magpasar og ordinansa alang sa pagpahamtang og mas bug-at nga penalty sa mga sakyanan nga maaberiya sa CSCR ug pabayron og dako alang sa towing ang mga tag-iya niini aron pagdasig kanila sa pagseguro nga padaganon ang ilang mga unit nga naa sa maayo nga kondisyon.

Niini, masegurado nga ang mga trak nga moagi sa CSCR naa sa maayo nga kondisyon. Kay ang naaberiya nga trak sa mao nga dapit wa mag-inusara. Di kadto unang higayon nga ang naaberiya nga sakyanan, o nagbangga, nakamugna og grabe nga kahuot sa trapiko.

Tun-an usab og maayo ang mga lakang nga pagahimuon kon dunay ingon adto nga insidente.

Lain sab nga angay susihon ni Gealon, kon tinuod man, ang pagtiket sa mga ambulansya nga nalambigit sa traffic accident. Sama sa gireklamo sa usa ka barangay emergency responder nga nagdala og pasyente ngadto sa hospital nga nabanggaan og motorsiklo.

Kana kay gisakay og ambulansya, sa ato pa, emerhensya kun dinalian. Apan matod sa responders nga gitiketan pa sila bisan gipasabot nga naa silay karga nga pasyente. Kon nagti­nga sa kamatayon ang pasyente unya namatay samtang naghunong ang ambulansya, ma­nubag kaha ang traffic office sa hitabo?

Di ba maayo nga i-note lang sa traffic enforcer ang hitabo samtang ang nakabangga maoy i-hold?

Gikinahanglan ang mga kausaban sa polisiya sa Cebu City Transportation Office (CCTO) nga mopahaum sa mga hitabo karon sa Dakbayan sa Sugbo. Kay samtang gidayeg ang mga traffic office sa mga Dakbayan sa Mandaue ug Talisay, ang Cebu City puno sa mga saway.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph