Makapahibulong kaayo ang ranking sa mga highly urbanized city (HUC) sa nasod diin ikatulo ang Dakbayan sa Lapu-Lapu samtang ang Cebu City naa lang sa ikaunom. Kini gibase sa gross domestic product (GDP) per capita. Kini nagpasabot sa economic output kada tawo kun produksyon ug pagkunsumo sa matag tawo, gasto sa kagamhanan, sama sa mga proyekto ug uban pa ingon man negusyo ug income sa exports ug imports.
Mao ni ang naandan nga sukdanan sa kalambuan sa usa ka nasod o dapit.
Sa laktod nga pagkasulti, sa tulo ka mga HUC sa Isla sa Sugbo, ang Lapu-Lapu City mao ang labing malambuon. Iyang naunhan ang gitawag og queen city of the south nga mao ang Cebu City. Wa magpasabot nga ang Lapu-Lapu mao na ang labing adunahan sa tulo ka mga siyudad.
Apan kon magpabilin ang Cebu City sa iyang dagan karon, adto kini padulong sa paghinay ug pagkabitay sa ekonomiya. Taliwa sa daghang mga problema nga giatubang sa administrasyon ni Mayor Michael Rama, dako kaayo ang posibilidad nga kini mahitabo.
Naglisod si Rama sa pagduso sa iyang gusto nga makab-ot kay wa nakauyon mismo ang iyang mga kauban o maingon tang kanhi mga kaalyado sa Konseho. Unsaon sab gud, usahay gud mangayo siya og buwan.
Kana lang gung P100 bilyunes nga budget. Asa man tawon manangkong ang Siyudad niana nga kantidad nga naglugos gani og abot ang iyang income og P9 bilyunes? Mas duol pa sa tinuod ang P20 bilyunes nga budget nga makab-ot kon aprobahan ang bag-ong real property tax.
Apan nabahin sab ang mga konsehal sa Cebu City sa bag-ong RPT. Gituki ug gilalisan pa. Kon di makalabang ang bag-ong RPT, kaduha-duhaan pang makab-ot ang P20 bilyunes nga kita sa pagtapos sa 2024.
Ang dako nga babag sa tinguha sa mayor mao ang iyang liderato nga giatubang og mga hagit bisan tuod kon tutokan, maayo ang iyang mga tumong ug katuyoan alang sa Siyudad. Apan gikinahanglan kaayo niya ang pagpaubos, makigtagbo ug maminaw sa iyang kaubanan, inay iyang badlisan ang ilang panag-uban.
Sa budget pa lang lagi, imposible kaayo ang iyang gipangayo. Sa isyo sa Cebu Bus Rapid Transit (CBRT) managlahi usab sila og baruganan sa mayoriya nga iya unta nga mga kaalyado.
Unta, gikinahanglan ang pagpaminaw sa usag usa, apan karon naglalis na man hinuon. Mao nang sama kini sa barko naglawig apan way tumong asa padulong kay ang kapitan ug iyang mga tripolante naglalis pa.