Maayo kining lakang sa Konseho sa Dakbayan sa Mandaue sa pagsang-at og usa ka ordinansa nga nagdili sa dili awtorisado nga mga mobile phone ug uban pang electronic communication devices sulod sa prisohan.
Niini, seguradong mas mapahugtan ang pagbantay sa seguridad ug kahapsay sa prisuhan.
Kaniadto, ang Bureau of Jail Management and Penology (BJMP) aduna nay regulasyon nga nagdili ning maong mga butang sulod sa prisohan apan luag ra ang pagpatuman niini tungod kay wala pa’y balaudnon kabahin niini.
Ang mahimo ra sa mga kapulisan mao ang pag-imbargo sa mga butang ug paghatag og pahimangno sa mga nahilambigit.
Apan karon nga aduna na’y ordinansa kabahin niini, hayan gilauman nga mohait ang ngipon ug mapahugtan og maayo ang pagpatuman niini, nga seguradong makahatag og kahadlok sa kon kinsa man ang nangahilambigit ning maong kalihukan kaniadto o ang nagplano sa mobuhat pa sa ingon.
Labing seguro, magduhadu-ha na ang mga nangahilambigit niini ug dili na kini mousab tungod kay basi sa bag-ong ordinansa, aduna nay silot nga ipahamtang sa mga malapason.
Ang mga makalapas – piniriso, bisita, mismong opisyal sa prisohan o bisan kinsa – pamultahan og P5,000 ug silotan og unom ka mga buwan nga pagkabilanggo. Ang mga opisyal sa prisohan tangtangan sab og allowance.
Angayan man lang sab gyud nga dili pagamiton ang mga piniriso og cellphone ug uban pa nga electronic communication devices gumikan kay puwede kini nilang magamit sa pagbuhat gihapon og salaod pinaagi sa pagtawag sa ilang mga koneksyon o mga katambayayong sa gawas partikyular kining mga piniriso nga nahilambigit sa druga.
Hinuon, tugotan man gihapon ang mga electronic device sulod sa prisohan ubos sa hugot, kontrolado nga mga kondisyon alang sa importanteng mga katuyoan sama sa emerhensiyang sitwasyon, mga pagdungog sa korte, o ang e-dalaw nga programa.
Ang Konseho sa Dakbayan sa Mandaue, pinangulohan ni Konsehal Oscar Del Castillo Jr., angayan nga daygon sa pagpaluyo niini nga ordinansa.
Kini nga lakang usa ka testamento sa pasalig sa dakbayan sa pagmugna og mas luwas ug mas hapsay nga palibot alang sa mga piniriso ug kawani.