Angayang daygon ang Criminal Investigation and Detection Group (CIDG)-Mandaue City Field Unit ug Bureau of Internal Revenue (BIR) sa malampusong operasyon niini sa pagsakmit sa multi-million nga balor sa mga illegal nga sigarilyo ug mga kagamitan niini sa usa ka warehouse sa Ouano Wharf, Barangay Looc, Mandaue City.
Usa kini ka dakong kadaugan batok sa nagpadayon nga illegal nga industriya.
Apan nganong niabot pa man og kapin sa usa ka tuig ang pagpaniid sa CIDG-Mandaue ug BIR una nila natuntolan ang factory?
Ngano sab nga sa ilang pagronda niadtong Sabado, Oktubre 5, 2024, wala may mga trabahante sa factory?
Ambot unsa’y tubag aning mga pangutanaha apan ang labing mahinungdanon, nasumpo kining maong illegal nga kalihukan, nga gituohang adunay international nga impluwensya hilabi na gikan sa negosyanteng Chinese nationals.
Hinaot nga dili moundang ang awtoridad sa paghimo og lakang aron masumpo kining maong illegal nga kalihukan kay nagbutang kini sa panglawas, kaluwasan, ug ekonomiya sa nasod sa katalagman.
Kining maong operasyon nga gipangunahan ni Police Captain Nigel Sanoy sa CIDG-Mandaue nagpakita nga dakong sindikato ang nagpaluyo ning maong illegal nga kalihukan.
Posibleng aduna pa’y laing factory nga sama niini ang nahiluna sa laing dapit sa Probinsya sa Sugbo ug sa tibuok Pilipinas.
Tungod kay wala moagi sa pagsusi sa gobiyerno, wala’y nasayod kon unsa’y mga gipamutang ning paghimo og peke nga mga sigarilyo ug mga sigarilyo nga adunay markang Chinese characters.
Kini nga mga sigarilyo naghatag og direktang hulga sa mga konsumedor nga wala nasayod sa posibleng risgo nga hatod ning maong produkto nga wala mosunod sa kalidad ug regulasyon.
Kinahanglan nga magpadayon ang mas lig-on ug komprehensibong mga lakang aron mahipos ang mga smuggler ug mga nagpayuhot niini nga klase sa negosyo nga walay pagtagad sa peligro nga hatod niini sa panglawas ug ekonomiya.
Angayan sab susihon sa gobiyerno nganong nakalusot sa nasod kining pag-import sa raw materials, mga makina ug uban nga mga kontrabando.