Golden Boy na ang gitawag og “Caloy” sa Philippine gymnastics. Congrats, Carlos Edriel Yulo sa imong makasaysayanong paglabni og gold medal sa men’s floor exercise sa gymnastics event sa 2024 Paris Olympics. Si Yulo, 24, maoy labing unang gymnast sa Pilipinas nga nakabaton og gold medal sa matag upat ka mga tuig nga kompetisyon. Ikaduha siyang atleta sa nasod nga nakahimo niini sunod ni weightlifter Hidilyn Diaz, kinsa nipatigbabaw sa miaging edisyon sa Olympics nga gipahigayon sa Tokyo, Japan.
Ning maong kalampusan, milyunes nga pinansyal nga pahalipay, nagkadaiyang mga kabtangan ug mga pasidungog ang naghuwat ni Yulo sa iyang pagbalik. Sa mandato sa Republic Act 10699 nga gipirmahan niadtong 2015, si Yulo gikatakda nga modawat og P10 milyunes nga insentibo gikan sa gobiyerno. Ang House of Representatives nisaad sab nga mohatag ni Yulo og P3 milyunes. Ang Megaworld nga gipanag-iya ni business tycoon Andrew L. Tan, mohatag ni Yulo og residential condominium unit sa McKinley Hill sa Taguig City nga nagbalor og P24 milyunes.
Ang Philippine Olympic Committee (POC) nisaad nga mohatag og balay ug yuta alang sa 4’11” nga atleta, kinsa lumad nga taga Malate, Manila. Usa ka bililhong pasidungog ang itunol sa Philippine Sports Commission (PSC) ngadto ni Yulo – ang Olympic Gold Medal of Valor.
Tipik pa lang kini sa mga dawatunon ni Yulo. Labing seguro aduna pa’y daghang mangabot sa umaabot hilabi na gikan sa pribadong mga sektor. Makaingon seguro ang mga tawo nga “Pagkahayay na man lang ni Caloy.” Kinsa man sab gud ang dili mahayahay kon makadawat sa mga dawatunon ni Yulo? Labing seguro, daghang mga ginikanan ang modani sa ilang mga anak nga magkat-on og gymnastics samtang bata pa. Apan dili kini ing-ani ka sayon. Singot, dugo, ug mga pagkaangol ang giantos ni Yulo sa daghang katuigan una niya naabot ang tumoy sa kalampusan. Taliwala niini, gilauman nga sa umaabot, daghang mga batan-on ang andam moantos sama sa giantos ni Yulo, makasunod lang sa iyang lakang.
Ning inspirasyon ug dungog nga imong nahatag sa matag Pinoy, dalaygon ka, Caloy.