Si Nanay Marilyn Layug, 63 nagsilbi nga simbolo o larawan nga ang tinguha nga makatapos sa pagtungha nga way deadline.
Ang pag-graduate ni Nanay Marilyn niadtong sa edad nga 63 anyos ubos sa Alternative Learning System (ALS) sa miaging semana dili lang istorya sa inspirasyon, apan usa ka pahinumdom ngadto sa katilingban nga ang edukasyon, ug ang pangandoy sa kaugmaong tam-is kon imo nang hingpit nga makab-ot ug way gipili nga edad.
Ang kalampusan nag-aghat kanato sa mas lawom nga pagsabot sa atong sistema sa edukasyon, kahimtang sa kinabuhi, ug ang determinasyon sa matag usa.
Una, ang sitwasyon ni Nanay Marilyn naglantaw sa realidad nga daghan sa atong mga kaigsuonan ang naputol ang edukasyon tungod sa kakuwang sa oportunidad, kakabus, ug uban pang sitwasyon nga nagsilbi nga babag aron nga motapos sa pag-eskuwela.
Ang ALS, isip usa ka programa nga naghatag og ikaduhang kahigayunan niadtong napakyas sa pagtapos sa ilang pagtuo. Apan ang pangutana: igo ba ang kahimtang sa ALS aron maserbisyuhan ang tibuok panginahanglan sa mga out-of-school youth ug adult learners?
Ang kasinatian ni Nanay Marilyn usa ka timaan nga ang ALS epektibo kon adunay suporta ug kadasig gikan sa mga estudyante ug magtutudlo. Apan dili unta kini mahimong usa lamang ka exceptional case nga ipahibalo matag graduation ceremony. Ang panginahanglan mao ang paghimo sa kalampusan ni Nanay Marilyn nga usa ka “norm” – nga daghan pa ang mosunod sa iyang lakang tungod kay ang sistema mihatag og tinud-anay nga tabang.
Ikaduha, ang kalampusan sa usa ka 63 anyos nga babaye nagpukaw sa atong kahimtang nga kasagaran ang edukasyon ginahisgutan lamang sa konteksto sa kabatan-onan. Kini nga mindset kinahanglan usbon. Ang tinuod nga kinabuhi usa ka padayon nga pagkat-on ug ang formal education dapat bukas sa tanang pangidaron. Ang atong mga palisiya ug pondo kinahanglan nga moapil sa mga adult learners nga gustong mopadayon sa ilang edukasyon, dili lang tungod kay kinahanglan nila og trabaho, apan tungod kay sila may katungod nga molampbo isip tawo ug lumulupyo.
Ikatulo, ang istorya ni Nanay Marilyn nagsilbing panawagan sa atong mga lokal nga lider, mga eskwelahan, ug komunidad nga mas suportahan ang mga inisyatibo sama sa ALS. Ang suporta dili lang pinansyal, apan lakip ang pag-ilhon ug pagpasigarbo sa ilang mga graduate nga sama niya. Ang iyang kalampusan dapat isaysay sa mga eskwelahan, barangay, simbahan, ug media aron makahatag og mas lapad nga inspirasyon ug pagdasig.
Sa tinuod, ang edukasyon wala’y deadline. Ang pagkat-on walay edad.
Si Nanay Marilyn Layug dili lang mi-graduate; siya usa ka buhing pamatuod nga ang kalampusan dili gikatakda sa edad, kundili sa kadasig, determinasyon, ug kahigayunan.
Busa sa katapusan, ang iyang istorya usa ka hagit kanato: unsa man ang atong gihimo aron ang tanan, bisan pa sa ilang kahimtang, makakat-on ug molampos? Ang tinuod nga progreso dili matan-aw sa gidaghanon sa kabataan nga nag-eskwela, apan sa kadaghan sa katawhan nga nahatagan og kahigayunan nga makakat-on, bisan pa kung sa unsang panahon sa ilang kinabuhi.
Padayon, Nanay Marilyn ug daghang salamat sa pagtudlo kanamo nga ang pangandoy dili gayud maluya kung ang kasingkasing determinado.