Magtiayon nga mga senior citizen, taga Brgy. Pusok, dakbayan sa Lapu-Lapu, nag-angkasay sa motorsiklo sayo sa Lunes sa buntag.
Apan pag-abot nila sa Gate 3 sa Mepza, sila nabanggaan sa usa ka PUJ nga multicab nga ni-counterflow. Patay nang niabot sa tambalanan ang asawa samtang ang bana naangol.
Lain na sab ni nga kinabuhi nga nakalas tungod sa mapasagaron nga pagmaneho og sakyanan. Daghan na sa mga aksidente, diin dunay nangakalas ug nangaangol, tungod sa counterflowing. Kadaghanan ra ba ini mga nagmotorsiklo.
Apan ning mao nga aksidente, ang motorsiklo nagsubay sa linya. Huna-hunaon unta sa mga drayber ang kakuyaw sa pag counterflow, labina sa mga nasudnong highway sama sa ML Quezon sa dakbayan sa Lapu-Lapu, diin daghan nang mga aksidente ang nahitabo.
Kuyaw man gud ning counterflowing tungod kay mangsugat ka sa mga sakyanan nga nagsubay sa kasugat nga lane. Kadaghanan, labina kon highway, kusog makapadagan bisan kon ang speed limit dinhi sa Pilipinas naa sa 80 kilometro matag takna. Daghan ang makapadagan og 100 kapin ka kilometro, labina kon lapad ug hawan ang dalan.
Naa pay uban nga drayber nga makapadagan bisan sa blind curve o kurbada, nagpalupad gihapon sa sakyanan. Unya mokawat na sa pikas lane. Pila na man ka mga kinabuhi ang nangakalas tungod niini?
Makaingon tang kada counterflow sa mga national highway o mga karsada nga hagip-ot, imong gisugal ang imong kinabuhi. Sugal tungod kay nasayod man ang driver sa dako nga risgo sa iyang gibuhat. Bisan sa karisgo nga maangol o makaangol, mosugat gihapon sa mga sakyanan sa opposite lane.
Naay ubang mga drayber mao pay mangasuko kon buyagon sa ilang gibuhat. Nagtuo man gud sila nga sakto ang ilang gibuhat kay wa sila nabadlong sa ilang kabuang. Mangutana pa og “ngano? Naigo ka?” Di ba hinanggaw?
Kanus-a pa kaha mahigmata ang mga drayber nga mapasagaron nga ang ilang sakyanan sama og pusil, kon pasagaran, makapatay.