Dakong garbo sa Pilipinas ang nakab-ot ni Carlos ‘Golden Boy’ Yulo nga nipatik og kasaysayan sa 2024 Paris Olympics, human nisakmit sa bulawang medalya sa Men’s Artistic Gymnastics Vault event niadtong Dominggo, Agusto 4, 2024.
Kini nga kadaugan nisunod sa iyang kadaugan sa Floor Exercise niadtong Sabado, nga nagpalig-on sa iyang posisyon isip usa sa labing maayo nga gymnast sa kasaysayan sa Pilipinas.
Ang performance ni Yulo sa vault nakapangangha sa nanan-aw, nagpakita sa iyang talagsaong kahanas, saktong lihok ug disiplina sa pagkaatleta. Nakadawat siya og putos nga 15.116 alang sa iyang duha ka vaults.
Ang iyang unang pagsulay nakakuha og puntos nga 15.433. Si Yulo nipakita sa iyang double twist, nga nakakuha og puntos nga 14.800.
Ang iyang gold medal sa vault dugang sa iyang sayo nga kadaugan sa floor exercise, nga nagdala sa iyang kanatibuk-ang Olympic golds ngadto sa duha.
Si Yulo maoy labing una ug bugtong atleta nga Pilipino nga nakadaog og duha ka gold medals sa Olympics.
Kauban sa duha ka gold medals ni Yulo, si Hidylyn Diaz nakakuha og una nga gold medal sa nasod sa Women’s Weightlifting 55kg category sa Tokyo Olympics 2020. Tungod niining nga kadaugan, ang Pilipinas dunay record sa tibuok sa kalibotan nga tulo ka gold medals sa kasaysayan sa Olympics.
Atol ning pagsuwat, Agusto 5, ang Pilipinas naa sa ika-19 nga pwesto sa medal tally tali sa 204 ka mga nasod nga nangapil sa 2024 Olympics. Maayo na kaayo kini nga pwesto sa Pilipinas sa kasaysayan sa Olympics nga giila nga labing karaan ug dakong kompetisyon sa paugnat-sa-kusog sa kalibotan.
Ug matag higayon nga dunay dakong dungog nga kalibotanon nga makab-ot ang usa ka Filipino, kini naghatag og kahiusahan sa pagbati uban sa pag-ambahan. Garbo sa nasod. Salamat, Carlos Yulo!