Ning nagkagrabe nga kainit dala sa El Niño phenomenon, ubay-ubay na nga mga local government unit (LGU) ang nangdeklarar og suspension sa face-to-face nga klase aron di mag-antos sa kainit ang mga tinun-an.
Apan si Cebu City Mayor Michael Rama gisaway kay wa nideklarar og suspension sa atubangay nga klase, di sama sa ubang local chief executive. Apan diay, ang katarungan niini mao ang paghatag sa mayor og gahom sa tagsa ka mga principal sa mga tunghaan nga makadeklarar og suspension sa klase kay mas nasayod sila sa kahimtang sa ilang tugkaran.
Bitaw sakto kaayo ang polisiya ni Rama sa paghatag og gahom sa mga principal sa pagsuspenso sa klase kay mas nasayod sila sa kahimtang sa ilang tagsa ka mga tunghaan.
Di tanan nga mga tunghaan sama og kahimtang o sitwasyon.
Ang mga tunghaan sa kabukiran ug kinapusoran sa siyudad managlahi og tugkaran. Kadaghanan sa mga tunghaan sa bukid di dasok og mga edipisyo, dunay mga kahoy sa palibot.
Sa kinapusoran sa siyudad naghuot ang mga building, hayan maihap lang ang kahoy sa palibot, kana kon naa man. Busa, init kaayo kini alang sa mga tinun-an. Daghan sab sa mga tunghaan sa city proper nga nagdasok sa usa ka classroom.
Kini nga mga sitwasyon haom kaayo sa paghatag ni Rama og gahom sa mga principal sa pagdeterminar kon angay bang suspensuhon ang face-to-face nga klaro inay iratsada ang tanan.
Di baya sayon ang di inatubangay nga klase, labina sa bukid, nga lisod ang kahimtang sa internet connection. Bisan gani sa city proper, di tanang mga tinun-an dunay access sa internet. Niini, mas nasayod sab ang mga principal.
Sa ato pa, case to case basis ang paghimo og lakang ug desisyon sa mga principal nga hayan mokonsulta usab sa mga magtutudlo nga ubos nila.
Inay sawayon si Rama, angay pa siyang daygon sa pag-empower sa mga school principal nga mas nasayod sa ilang sitwasyon kay sa mayor. Mas nahibawo sila kon gikinahanglan bang suspensuhon ang face-to-face nga klase o di.
Sa kadaghan sa mga problema nga giatubang karon sa chief executive, mas maayo nga ang ubang school officials maoy sangunan sa desisyon nga sarang kaayo nila nga himuon.
Gihimo na kini sa mayor kaniadto busa way katarungan nga ning panahuna di kini mahimo sa school principals.