Editoryal: Di angay mokompyansa

Editorial Cartoon by Ariel Itumay
Editorial Cartoon by Ariel Itumay

Gironda sa mga otoridad ang usa ka Philippine Offshore Gaming Operators (Pogo) sa Bamban, Tarlac. Nahingangha sila sa ilang nakaplagan nga luho nga mga villa, dunay swimming pool ug ang labing makapatingala mao ang mga tunnel. Nakaplagan nga tipik sa luna iya ni Bamban Mayor Alice Guo.

Apan si Guo niingon nga iya nang nabaligya ang mao ang kabtangan. Makapakugang sab kay ang Pogo compound nahimutang sa likod sa munisipyo mismo.

Ang lain nga kahibulongan mao ang pagkatawo ni Guo. Laliman ka, bisan si Presidente Ferdinand Marcos nahibulong sa background ni Guo kay way mga politiko sa Tarlac nga nakaila kaniya. Sa iya pang personal nga background, nag late registration kuno siya sa edad nga 17 anyos.

Ang iyang inahan giingon nga Pinay samtang ang iyang amahan Chinese. Way school records sa iyang pagkabata kay matod niya gi home school siya sa iyang mga ginikanan. Nahibaw-an ning tanan dihang siya gipatawag sa Senado alang sa usa ka imbestigasyon.

Way nakaila kang Guo nga politiko. Daghang mga pangutana ang mga senador nga iyang gitubag og “hindi ko na maalala.” Daghang memes ang nanggawas sa social media tungod sa mao nga linya sa iyang tubag.

Tungod niini, daghan ang nagduda nga siya usa sa mga espiya sa China nga nakasulod na sa byurukrasya. Bag-o lang gani gihulipan sab ang usa ka military official sa Western Command (Wescom) nga nihimo og special arrangement tali sa China. Napalgan nga nakatungha diay siya isip militar sa China.

Ning kasungian karon tali sa China ug Pilipinas, gikinahanglan ang hugot nga pagbantay ug pagpaniid kay basin usa niana ka buntag, mahigmata na lang kita nga gilibutan na ang nasod sa mga sundawo sa China, uban kanila nakasulod na mismo sa kagamhanan.

Bisan ang administrasyong Marcos karon naninguha nga masanta ang sayop nga mga impormasyon nga gihimo sa China nga gitumong aron mabuak, mabahin ang nasod kalabot sa isyo sa West Philippine Sea.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph