Editoryal: Di maayo sa ‘patas-anay sa ihi’ karon

EDITORYAL
EDITORYAL

Grabe ang pag-us-us sa water supply sa Metropolitan Cebu Water District (MCWD) kay sa kinatibuk-an, nakuhaan kini og 21 porsyento. Duna nay mga barangay sa siyudad nga hinay o wa na gyuy agas.

Makapaabot pa ang publiko sa mas grabe nga kakuwang sa tubig tungod kay gibana-bana nga molanat pa og mga duha ka buwan ang init nga masinati sa nasod.

Duna man tingali mga pag-uwan, apan panagsa lang gihapon tungod sa epekto sa El Niño. Karon ganing Mayo, gipaabot nga mograbe pa ang kainit kay mao ni ang buwan sa grabeng pag-init matag tuig.

Samtang mao ni ang nahitabo sa water supply, si Cebu City Mayor Michael Rama nagplano nga motukod og laing water firm nga dumalahon sa Siyudad. Ubos sa balaod, mahimo ba kaha kini nga naa pa may MCWD nga nagserbisyo sa dakbayan sa Sugbo? Maayo lang og wala.

Di karon panahon sa pag-uyog sa water firm. Bisan tuod klaro nga natandog ang garbo sa mayor, isip amahan sa Dakbayan, angay una niyang ipadaplin kining power struggle karon. Di man gani maayo ning panahuna ang pagpanghilabot sa Local Water Utilities Administration (LWUA) sa MCWD karon taliwa sa paspas nga pagminos og maayo supply sa tubig.

Liboan ka baril matag adlaw ang pag-us-os sa supply sa tubig sa Metro Cebu. Wa pa gani matapos ang Abril. Kon naa sa 21 porsyento ang pag-us-us karon, di kaha moabot sa 50 porsyento sa di pa matapos ang Mayo? Unya, ang away sa pagdumala sa water firm makaayo ba sa mga Sugboanon nga seguradong makasinati og kauhaw? Mao ni ang angay nga hinuktokan sa kadagkuan sa dakbayan sa Sugbo.

Way maayong sangputanan ang pagpatas-anay sa ihi. Mao ra ba sab ni ang usa sa mga hinungdan nga sulod sa daghang katuigan, ang Pilipinas hinay nga niusad tungod sa grabeng bikil sa politika.

Mao sab ni gani ang hinungdan kon nganong ang Siyudad sa Sugbo ubos sa administrasyon karon wa kaayo makabuhat og dagkong mga programa tungod kay gawas nga kwestyunable kon igo ba ang pundo alang sa gihan-ay nga mga proyekto, nagsige sab og lalis, sama sa giduso nga bag-o nga real estate tax, Cebu Bus Rapid Transit (CBRT) project ug uban pa.

Way klaro nga mga infra project nga ikapakita ang Siyudad, gawas lang sa subsob nga kampanya batok sa basura nga nagtipun-og sa mga estero, kanal ug kasapaan.

Sa kadaghan sa mga problema nga giatubang sa mayor karon, ang MCWD di angay niyang tutokan kay nagbuhat man sa ilang gimbuhaton ang mga nagdumala. Naninguha nga katapakan ang kakuwang sa supply sa tubig nga giantos karon sa katawhan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph