Editoryal: Di mabasol ang 4 ka kawani

EDITORYAL
EDITORYAL

Niasumer na si Acting Mayor Raymond Alvin Garcia human gisuspenso og unom ka buwan sa Ombudsman sugod niadtong Biyernes si Mayor Michael Rama. Di silot ang preventive suspension alang kang Rama ug sa laing pito ka mga opisyal kon di pagpugong lang nga di sila makaimpluwensya sa imbestigasyon sa reklamo sa upat ka mga kawani.

Sa iyang unang adlaw, si Garcia nimando gilayon sa pagpa-release sa 10 ka buwan nga sweldo sa upat. Iya usab nga gipaimbestigar ang giingong pag harass nga nasinati sa upat human gisuspenso sila si Rama ug kaubanan.

Si Garcia nipasalig nga ang mga isyo sa Compania Maritima, Metropolitan Cebu Water District (MCWD) ug uban pa nga giatubang ni Rama iyang tagdon apan sa diplomatikanhong paagi.

Maayo ang lakang ni Garcia kay inay mangisog ug palaban, ang pagkamaaghop ug kalma mas nindot nga armas, inay mokisi-kisi ug mokiha. Mas maayo nga paagi sa pagpakita sa gahom kay sa malukop lang sa pagkiha ni bisan kinsa.

Natural nasakitan si Rama ning nahitabo kaniya. Niingon ang suspended mayor nga di siya ang nagkupot sa payroll busa ngano’ng siya man ang gikiha?

Of course, command responsibility isip mayor mao nga angay siyang manubag sa nahitabo sa iyang tugkaran, labina nga naapil sa isyo mao ang administrator nga iyang suod nga kaalyado. Nahi­tabo ang kontrobersiya sulod sa buhatan diin ang nangulo mao ang asawa sa iyang administrator.

Nasayod ba kaha ang mayor sa nahitabo? Kon nasayod man, iya lang ba kaha nga gipiyungan? Wa siya mohimo og lakang sa gihimo nga inhustisya nga gihimo ngadto sa upat ka mga kawani, kinsang pwesto pulos permanente. Bisan gud ang Civil Service Commission (CSC) ingon sa wa gituman nga unta nihukom na man kini nga ilegal ang gibuhat sa administrasyon ngadto sa upat.

Di unta kini mahitabo kon ang mayor nihimo pa og lakang aron makorihian ang sayop nga pagbalhin sa upat. Di sila angay basulon kay igo lang silang nibarog sa ilang katungod ug nangayo og hustisya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph