Sa adlaw’ng Lunes, Hulyo 28, 2025 ipahigayon ang ika-upat nga State of the Nation Address (SONA) ni Presidente Ferdinand “Bongbong” Marcos Jr.
Sa mga nahitabong trahedya ug kalamidad nga nasinati sa ubang mga Pilipino, mipagawas og direktiba ang House of Representatives pinaagi sa ilang Secretary General nga si Reginald Velasco nga nag-awhag sa mga sakop sa Kongreso ug ubang manambong nga likayan ang pagsul-ob og garbo nga pamisti o bongga nga outfit sa maong okasyon.
Ang maong mando nga nagdili sa pormal nga red carpet events, staged photo ops, ug fashion coverage sa SONA nga nahisama aron nga dili masawayan nga nahisama na sa usa ka fashion show event ang pagpahigayon sa SONA.
Sa miaging mga tuig, nahimong catwalk sa politikong pasundayag ang SONA imbes nga halangdong plataporma sa pagsaysay sa kahimtang sa nasod ug pamalaod.
Apan ang pangutana nga angayang hatagan og atensyon: Kon wa mahitabo ang sunodsunod nga kalamidad mopagawas kaha og memo ang House of Representatives Secretary General nga nagpahinumdom sa mga manambong nga himuong simple ang ilang isul-ob sa maong kalihokan?
Kinahanglan sab natong hinumduman nga ang tinuod nga simpatiya dili kutob sa sinina. Ang tinuod nga panaghiusa alang sa katawhan makita sa polisiya, serbisyo, ug aksyon—dili lang sa pagsul-ob sa hapsay nga barong o simple nga Filipiniana.
Ang SONA unta usa ka panahon sa pagkita sa tinuod nga direksyon sa atong nasod. Angay nga ang mga lider motindog isip tinud-anay nga representante sa katawhan—dili pagpakita sa ilang mahalon nga gisul-ob ug matang sa materyales nga gigamit aron ikapanghambog atubangan sa camera, kondili mamati ug motubag sa tinuod nga panginahanglan sa ilang mga distrito.
Sa katapusan, ang kasakit sa katawhan dili kinahanglan og fashion statement aron madungog, kinahanglan ang tinud-anay nga serbisyo, pagpakabana, ug pag-alagad.
Kay sa usa ka nasod nga permi naunlod sa baha, usa ka dakong problema, angay nga ang mga lider mangita dili ang pagpasigarbo sa ilang gisul-ob apan ang pagpangita ug pagtuman alang sa mas lig-on nga solusyon.