Editoryal: Dili gyud mokompyansa

Editoryal: Dili gyud mokompyansa

Dili kita mokompyansa ning panahon sa ting-uwan. Dili matagna ang trahedya tungod sa pagbunok sa uwan human sa taas nga huwaw mugna sa El Niño phenomenon.

Usa ka bug-at ug masulub-ong pasidaan ang nahitabo sa usa ka grupo sa pamilya nga sakay sa SUV pick up nga naanod sa bul-og sa baha sa sapa.

Nahitabo kini sa Sityo Mangitngit, Brgy. Lower Matimao-an, lungsod sa Carmen, alas 5:45 sa hapon, Lunes, Hulyo 8, 2024, diin ang SUV nga gisakyan sa dili mominos 17 ka tawo, nipugos sa paglatas sa spillway nga gilapawan sa baha.

Sumala sa taho, ang drayber gipasidan-an na sa mga lumolupyo nga dili molabang sa spillway apan, ang drayber nipadayag sa iyang kakompiyansa.

Matod pa, dili maanod ang sakyanan tungod sa kabug-at sa kadaghang mga sakay niini apan, sukwahi ang nahitabo.

Pag-abot sa tunga-tunga, gihampas sa bul-og sa tubig ug naanod. Ug atol ning pagsuwat, tulo ang kompirmadong namatay samtang upat ang missing ug napulo ang naluwas.

Ang grupo gikan nangaligo sa mountain resort sa Barangay Cantucong. Lakip sa missing mao ang bag-ong gikasal niadtong Sabado, Hulyo 6, 2024, diin ang babaye mabdos apan nabangalan.

Tinuod ulahi na pagbasol. Apan kini naghatag kanato og hugot nga pasidaan ug leksiyon ning sayo pa nga pagsulod sa panahon sa ting-uwan.

Dili ba nag-ung-ong usab ang pagsulod sa La Niña phenomenon nga gibana-bana sa ulahing quater ning tuiga?

Manghinaot kita nga dili na kini mausab. Mag-ampo kita uban sa lihok nga pagpakabana labi na sa matag higayon nga maglain ang templa sa panahon.

Ug ang bugtong yawe nga makalikay sa mga masulub-ong panghitabo ning panahuna - dili gyud mokompiyansa. Kalkulado ang atong lihok atol sa pagbunok sa uwan.Sa mga biktima sa trahedya sa Carmen, mga panghinaut nga sayo kamo makabangon ug mahupay ang kagul-anan gikan sa masulub-ong kasinatian.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph