Bisan sa unsang lihok sa kinabuhi, kinahanglan nga dili mokompiyansa. Kalkulado ang tanan para kon dunay di malikayan nga bulilyaso, dili usab ingon kabug-at ang epekto.
Ning pagsulod na sa panahon sa ting-uwan, daghang ang nalipay nga nakasanati og alibyo human sa taas nga huwaw tungod sa El Niño phenomenon.
Apan dili gihapon kita mokompiyansa sa posibling mga emerhensiya ug mga sakit nga sagad motumaw sa ting-uwan.
Sumala sa website sa National Epidemiology Center (NEC) sa Department of Health (DOH), ang komon nga sakit nga motumaw ning ting-uwan mao ang gitawag nga ‘Wild’ o ang water-borne infectious diseases, influenza, leptospirosis, ug dengue.
Busa dili kita mokompiyansa. Magpakabana. Duol dayon sa mga batid sa medisina sa dili pa maluya ug dili komplikado ang pagtambal. Dili pa usab dako og magasto. Timan-i, ang panglawas maoy puhonan sa tanang puhonan.
Sa pagsugod sa ting-uwan, ang leptospirosis o virus gikan sa hugaw sa ilaga peligro ning panahuna tungod sa baha o lunop ug ang mga hugaw sa ilaga naglutawlutaw niini labi nga dili pa dugay natapos ang ting-init.
Gani, gitaho sa DOH 7 nga upat na ang nangamatay sa leptospirosis sa Central Visayas. Duha gikan sa dakbayan sa Sugbo, usa sa dakbayan sa Mandaue, ug usa sa lungsod sa Daanbantayan.
Ug sa kaso sa leptospirosis, nag-una ang Bohol nga adunay 19, 9 sa Cebu Province, 7 sa dakbayan sa Sugbo, 5 sa Negros Oriental, 1 sa Siyudad sa Lapu-Lapu ug 1 sa Siyudad sa Mandaue.
Kini ang pahibalo ni Dr. Eugenia Mercedes Cañal, Regional Epidemiologist sa DOH 7, atol sa usa ka online forum nga gipahigayon sa usa ka hotel sa dakbayan sa Sugbo, Martes, Hunyo 25, 2024.
Risgo kaayo nga masakit sa leptospirosis kon dunay mga garas o samad sa panit nga mahumol sa baha nga adunay virus nga gikan sa hugaw sa ilaga.
Hugot kini nga pasidaan sa tanan labina sa pag-ubog sa baha kon walay boots o bisan unsang kahimanan nga makapanalipod sa kaugalingon. Dili kita mokompiyansa.