Ang Pilipinas gikinahanglan nga alerto aron nga mapanalipdan ang nagkaduol nga May 12 nga piniliay sa nasud nga dili ma-impluwensiyahan sa mga langyaw ilabi na sa nasud sa Tsina.
Bisan pa man nga mihimakak ang Tsina sa pasangil nga nagtinguha sila sa pag apil-apil sa 2025 election sa dihang ang tigpamaba sa Foreign Ministry nga si Guo Jiakun miingon nga wa sila manghilabot sa domestic affairs sa Pilipinas.
“We have no interest in interfering in Philippine elections,” matod pa ni Guo.
Sa sayo pa, atol sa Senate hearing ang National Security Council Assistant Director General Jonathan Malaya nibutyag nga adunay mga timailhan o indikasyon nga ang Tsina nanghilabot sa nagkaduol nga piniliay sa nasud. Giingong adunay tinguha ang Tsina nga mosuporta sa mga kandidato nga pro-China ug gi-target kadtong mga kandidato nga supak kanila.
“Kung ano ‘yung script na nanggagaling sa Beijing, ‘yun din naman ang sinasabi nila sa Pilipinas. We can see that Mister Chairman, for example, the Balikatan Exercises are happening right now, you will see narratives coming from Beijing that the Balikatan Exercises is a threat to regional peace and stability and you’ll also hear that kind of statement coming from local proxies who follow the script coming from Beijing,” sigun pa ni Malaya.
Tungod niini, nabalaka ang mga opisyal nga pinaagi sa mga giingong sinyales sa pag interbiner sa Tsina nga daw nagkombinser sa opinyon sa publiko ug pagsuporta sa kandidato nga ipaagi sa online propaganda lakip na ang lokal nga mga suporter.
Angkunon o dili sa Tsina ang giingong nagpahipi nga tinguha nga mo-interbiner sa piniliay, gikinahanglan ang mga Pinoy magbinantayon. Ang piniliay desisyon alang lang sa mga Filipino ug dili angayan nga adunay langyaw o laing nasud nga mo-impluwensiya sa kandidato nga makalingkod sa posisyon sa gobiyerno.
Deserve nato nga makaangkon og lider nga pinili sa mga Filipino dili tungod kay adunay langyaw nga na-interest. Busa magmatngon kita, ug panalipdan nato ang atong demokrasiya.