Editoryal: Dinalidali nga trabaho

Editorial Cartoon by Ariel Itumay
Editorial Cartoon by Ariel Itumay

Usa ka buwan ug pipila ka adlaw gikan karon mao na ang 2024 Palarong Pambansa nga ipahigayon sa dakbayan sa Sugbo apan ning panahona, subo nga pamalandungon nga wala pa hingpit matapos ang renobasyon sa Cebu City Sports Center (CCSC) nga main venue sa kalihukan.

Apiki sa panahon ang pagsugod sa trabaho sa rubberized track oval taliwala sa kapin sa tuig nga pagsira sa CCSC tungod sa pag-andam niini alang sa Palarong Pambansa. Nagdali-dali na ug tungod niini, maapektuhan ang kalidad sa trabaho.

Tiaw nga sama sa madiretso na kini sa paggamit sa mga atleta sa aktuwal nga duwa ug walay igong panahon sa pagsuway o testing sa iyang kalidad sa rubberized track oval una hingpit gamiton. Dili lang kini, lakip sa ubang bahin sa pagdugang og bleachers.

Hinuon, ang ubang mga duwa ipahigayon sa ubang mga pasilidad gawas sa dakbayan sa Sugbo sama sa dakbayan sa Mandaue ug Lapu-Lapu nga ningtanyag sa pagpagamit sa ilang nindot nga sports facilities isip suporta alang sa kalampusan sa 2024 Palarong Pambansa.

Nganong langay kaayo ang pagrenobasyon sa CCSC? Daghang gipasanginlan. Apan dili ba kaha usab dunay tulubagon ang kontraktor? Nganong nagtuga-tuga sa proyekto? Labaw nga makapaintriga nga pangutana, nganong midaog sa bidding?

Ug sa pagpaubos sa preventive suspension ni Mayor Michael Rama, si Acting Mayor Raymong Alvin Garcia daghang naugkat nga kuwestiyon labina sa bahin sa paggasto sa P400 budget sa Palarong Pambansa.

Manghinaot kita nga matapos ang trabaho sa CCSC tukma sa pag-abli sa labing dako nga kalihokan sa paugnat-sa-kusog sa nasod. Garbo sa mga Sugbuanon ang kalampusan sa Palarong Pambansa dinhi sa Sugbo nga suportahan natong tanan.

Apan magbilin usab kini og leksyon labina sa mga lokal nga opisyal nga ang dinali-dali nga trabaho sagad dunay kaluha nga bulilyaso. Hinaot nga dili kini mahitabo sa naasoy nga kalihukan dinhi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph