Ang makapasubo nga balita kabahin sa pagkalumos sa tres anyos nga si Ryle Laspoña sa Sityo Ilag, Barangay Cambang, Toledo City niadtong Hunyo 7, 2025, usa ka hait nga pahimangno alang sa tanan ning panahon sa ting-uwan.
Niadtong Hunyo 2, opisyal nga gideklarar sa Philippine Atmospheric, Geophysical and Astronomical Services Administration (Pagasa) nga nagsugod na ang panahon sa ting-uwan.
Pipila lang ka mga adlaw ang ninglabay human niini, usa ka inosenteng kinabuhi ang nakalas ug ang insidente nagpadayag sa usa ka seryoso nga isyu nga angayang hatagan og pagtagad ning panahuna.
Ang inahan sa biktima nga si Eva, 25, giingon nanglaba sa tubod sa sapa sa sayo sa buntag ug gibilin niini ang iyang anak nga nag-inusara sa ilang balay.
Gituohan nga niapas si Ryle sa iyang inahan, nga maoy kanunay niining buhaton. Apan ning higayuna, naanod si Ryle sa baha nga wala’y nasayod. Ang bana ni Eva wala atol sa insidente kay nagtrabaho kini sa Dakbayan sa Lapu-Lapu.
Pag-uli ni Eva sa ilang panimalay, nakugang siya nga wala ang iyang anak sa ilang balay ug gipangita kini niya sa ilang mga silingan.
Paglabay sa duha ka mga oras, nakita ni Eva sa usa ka Facebook post nga adunay bata nga napalgang patay nga nalumos sa sapa sa pikas sitio, mga 500 metros ang gilay-on gikan sa ilang panimalay.
Nasuta ni Eva nga ang iyang anak mao ang biktima. Labing seguro, dako ang iyang pagmahay nganong iyang gibiyaan nga nag-inusara ang iyang anak sa ilang balay.
Tingali naanad na si Eva niini kay kanunay na man sab nga moapas ang iyang anak kon manglaba siya sa sapa apan ang nakalahi lang ning higayuna, panahon na sa ting-uwan.
Ning panahuna, adunay mga higayon nga dili mabantayan nga mosaka lang og kalit ang level sa tubig sa sapa bisan maayo ra ang panahon sa kapatagan. Kasagaran kining mahitabo kon nag-uwan sa kabukiran.
Kini nga trahedya nagpahinumdom sa mga ginikanan nga kanunay nga bantayan ang ilang anak hilabi na kon gamay pa kini, sama ni Kyle.
Nagpahinumdom sab kini sa tanan nga ang deklarasyon sa Pagasa nga nagsugod na ang panahon sa ting-uwan dili lang usa ka anunsyo, usa kini ka pahimangno hilabi na sa mga nagpuyo duol sa sapa ug sa dapit nga posibleng adunay mahitabong pagdahili sa yuta.
Gikinahanglan ang dobleng pag-amping ning panahon sa ting-uwan.