Ang bag-o lang nga pagronda sa usa ka apartment sa Siyudad sa Sugbo, nga nagbutyag sa usa ka sopistikado nga “kitchen-type” nga laboratoryo sa druga, nagpadala og mensahe mahitungod sa nag-usab-usab nga estilo sa paggama sa ilegal nga druga sa Pilipinas.
Kaniadtong Lunes, Hunyo 30, 2025, ang Regional Police Drug Enforcement Unit 7, pinangulohan ni Police Brigadier General Redrico Maranan, nakadiskubre sa lawak diin giingon’g giprodyus ang cocaine, shabu, ug ecstasy sa usa ka chemical engineer.
Kining insidente, nga niresulta sa pagkasikop ni Stephen Tapulada, 32, nanginahanglan dayon og pagtagad sa hingtungdan’g ahensiya sa gobyerno.
Ang makapaalarma mahitungod niini nga kaso mao ang giingong doble nga papel ni Tapulada.
Sa sinugdanan, lima ka mga bulan na ang nilabay, gitumbok siya nga tinubdan sa ecstasy sa mga high-end nga night club.
Apan, ang iyang pagkasikop human sa usa ka detalyadong buybust operation niadtong Hunyo 27, 2025, nagpadayag og mas dako nga negosyo sa illegal nga drogas.
Ang pagkadiskubre nga ang iyang giabangan nga apartment usa diay ka bug-os nga drug laboratory, kompleto sa nagkatag nga mga kemikal ug bisan sistema sa bentilasyon aron matabonan ang baho, nagpadayag sa daghang mga butang.
Kini nakapagawas og mga pangutana kon giunsa paghaylo ang mga indibidwal nga adunay espisyal nga kahibalo sa paggamit sa mga kemikal sa paghimo og druga. Ang gilapdon sa giingong operasyon ni Tapulada parehas nga makatugaw.
Ang impormasyon nga nakolekta sa kapulisan nagsugyot nga ang mga linuto nga druga gipang-apod-apod ngadto sa mga high-end nga night club sa Boracay, Metro Cebu, ug bisan hangtod sa Zamboanga City.
Ang giingong pag-customize sa party drugs base sa hangyo sa kustomer bahin sa potency—”isog ba o mild lang ang tama”—mas naghulagway sa market-driven nga kinaiya niining illegal nga negusyo ug ang mga paningkamot nga himuon sa mga prodyuser aron matubag ang panginahanglan sa ilang mga kustomer.
Ang asoy sa tag-iya sa apartment nagsilbeng usa ka tin-aw nga pahinumdom kon unsa kadali nga dili mamatikdan ang ingon nga mga kalihukan.
Bisan pa nga duha ka mga tuig na nga nag-abang si Tapulada sa unit, nagpaila sa iyang kaugalingon isip usa ka “home-based chemical engineer,” ug kanunay nga advance nga mobayad sa abang, wala gyud sila’y bisan unsang pagduda sa iyang giingong illegal nga kalihukan.
Gipasiugda niini ang mga hagit nga giatubang sa mga tag-iya sa balay ug mga komunidad sa pag-ila ug pagpugong sa ingon nga tinago nga mga operasyon sulod sa mga residential nga lugar. Samtang ang inisyal nga pagtimbangtimbang ni PDEA 7 Director Alex Tablate nagklasipikar niini isip usa ka “mini-laboratory,” ang kadaghanon ug nagkalainlaing klase sa druga nga gi-produce, uban ang sopistikado nga setup, nagsugyot og usa ka dakong hulga.
Kining insidente magsilbeng usa ka kusganong panawagan sa pagkaalerto alang sa mga ahensya sa pagpatuman sa balaod aron palig-unon ang ilang pagpangolekta og impormasyon, ilabi na sa mga indibidwal nga adunay espisyal nga kahanas nga posibleng madani sa paghimo og illegal nga kalihukan.
Nanawagan usab kini sa mas dako nga kahibalo ug pagbantay sa komunidad. Ang mga tag-iya sa paabangan dasigon sab sa pag-report sa kadudahan nga mga kalihukan, tungod kay ang ilang kooperasyon importante sa pagbungkag niining mga tinago nga illegal nga produksyon sa druga.