Gikinahanglan nga pahugtan ang Maritime security dinhi sa nasud human sa sunodsunod nga pagkakaplag sa binilyon nga kantidad sa drugas sa kadagatan.
Mga mananagat sa Lalawigan sa Pangasinan nakadiskubre og binilyon nga kantidad sa illegal nga drugas nga gibanabana nga mobalor ngadto sa P1.7 bilyones.
Niadto lang Hunyo 2, didto sa kadagatan sa Masinloc, Zambales napalgan sab ang mga pinutos nga shabu nga gidudahang mokabat sa P5 bilyones.
Sa maong kalambuan, sinyales kini nga gikinahanglan nga palawman ug tutokan ang mga angayang lakang nga ipatuman sa tuyo nga masumpo ang illegal nga drugas.
Ang mga nakuha nga drugas sa kadagatan sa Pangasinan gi-turn over sa mga mananagat ngadto sa Philippine Coast Guard ug angayan lang sab sila hatagan og pasidungog sa pag-abag sa kagamhanan.
Sa maong panghitabo ato bang ma-isip nga ang kadagatan gihimo nang agianan sa illegal drugs?
Ang gubat batok sa droga dili magmalampuson kon ang atong kadagatan diin nanginabuhi ang atong mga mananagt magsilbi nang agi-anan sa narcotics.
Mahulagway nga usa lang ka reactive approach ang gihimo sa awtoridad sa dihang nakadawat og impormasyon gikan sa mga mananagat kalabot sa kadudahang packages nga naglutaw lutaw sa dagat.
Atong gikinahanglan mao ang proactive solution, lig-on ug malungtaron nga action plan batok niining organized nga grupo nga naglambigit sa maong binuhatan.
Kon ang maong drug shipments nga napalgan sa dagat diin adunay involved nga international syndicates ang pagpatrolya dili paigo.
Nagkinahanglan adunay polisiya ug adunay klaro nga direktiba bahin sa inter-agency cooperation, paggamit og moderno nga surveillance technologies, ug pagpalawom sa imbestigasyon ug pagsilot niadtong mga nalambigit.
Dili unta nga ang mga yanong mananagat mas mao pay makauna ug mangunay sa pagkuha sa mga kontrabando gumikan kay huyang ang maritime defense sa nasud.
Kini usa ka sinyales nga gikihananglan molihok ang gobiyerno nga palig-unon ang maritime security system.
Gikinahanglan nga pukawon ning Maritime forces sa nasud basin og nahinanok pa sila sa ilang pagkatulog. Hoy gising!