Editoryal: Dunay gangsters sa City Hall?

Editoryal: Nagwang-wang?
EDITORYAL

Sa gangster movies, ang mga negusyante mohatag og protection money sa gang nga naghupot sa usa ka lugar isip iyang teritoryo. Kon dunay mohilabot sa negusyo nga lain nga gang, ila ning protektahan o aron di hilabtan sab. Magdepende ang gidak-on sa hatag sa kadako sa negusyo. Ang gang sab ang modiktar kon kapila o frequency sa paghatag.

Ambot kon tinuod o bag-o pa ba kining nabutyag karon nga duna diay mga kawani sa Cebu City Hall nga gikaltasan intawon ang sweldo. Kana kon tinuod man. Usa ka kawani nipasangil nga gikuhaan og P1,500 ang iyang sweldo sa iya ra sab nga kauban.

Nisugot lang sab siya tungod sa kahadlok nga siya tangtangon gikan sa listahan sa mga kawani. Naa say lain nipasangil nga gikuhaan og dako ang iyang sweldo kay ipalit og serin sa motorsiklo. Sama sa laing kawani, nahadlok sab ni siya.

Kon tinuod man ni nga mga pasangil, kangil-ad ani nga buhat. Maora sila og gangster og mentalidad. Wa ni kalainan sa gipangayo nga protection money kay maisip nga proteksyon ni aron di matangtang sa listahan sa mga kawani.

Kini ra ba tawon mga tawhana, kon job order (JO) man, huyang kaayo ni sila tungod kay bisan unsa nga oras o adlaw, mahimo ra ni sila nga tangtangon. Busa dali ra ni silang hadlukon, di sama sa mga kawani nga contractual ug kadtong dunay permanente nga posisyon. Mahimo ra kaayo nga mosukol, sama niadtong mga kawani nga nikiha pa sa mga opisyal, apil na kang suspended Mayor Michael Rama kay protected sila sa Civil Service Law.

Kon tinuod sab ni nga alegasyon, ang pangutana kon unsa na ni kadugay nga gibuhat diha sulod sa City Hall apan karon lang nabutyag kay nakakita ang mga kawani og kaalyado nga manalipod kanila?

Di pa ni mao. Duna say pasangil nga dunay mga kawani nga nangawat og gasolina gikan sa mga sakyanan sa Siyudad nga gi-park. Ila pang gilambigit ang usa ka opisyal sa disaster management sa siyudad nga maoy nagpasiugda.

Basin diskarte lang sab ni, kana kon tinuod, sa mao nga mga kawani aron di sila hilabtan o isumbong. Lisod sab tuohan kay gamay ra kaayo ni nga magpakauwaw ang usa ka dako nga opisyal sa Siyudad.

Apan kining buhata buhat sab og gangster, apan lahi lang nga paagi. Kon tinuod man, unsa na kaha kadugay kining buhata diha sa City Hall? Karon lang ba kaha kini nabulgar kay duna nay mga kawani nga wa na kaagwanta nga nagtan-aw ani nga buhat?

Hinaot pang di kini sama sa ubang mga imbestigasyon ug sihag ang kalambuan aron masayod ang publiko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph