Sa usa ka binukbokay ibabaw sa ring, kulbahinam, kahinam, ug kabalaka ang bation sa mga tumatan-aw hilabi na kon si Filipino boxing legend Manny Pacquiao ang usa sa mga moaway.
Apan kining nibaniog nga panagsukmagay unta nila ni Philippine National Police (PNP) Chief General Nicolas Torre III ug acting Davao City Mayor Sebastian “Baste” Duterte, usa ra ka pulong ang haom nga kaayong ihulagway niini: kataw-anan.
Gikan pa lang sa pagsugod ning maong isyu, milyunes na nga mga Pinoy ang nagsunod niini sa nagkadaiyang social media platforms, sa telebisyon, ug mga mantalaan ug labing seguro, usa ra ang rason: kataw-anan.
Kining mainitong panagbangi sa politika nakahatag og grabeng kalingawan sa kinabag-ang sa katawhang Pinoy, hilabi na sa mga adunay gipas-an nga bug-at nga problema.
Ambot kon unsa nga bakukang ang nasulod sa alimpatakan ani nila ni Baste ug Torre nga niabot man sila ning puntoha diin ang seryusong isyu sa gobiyerno nahimo man nilang kataw-anan.
Ning maong isyu, unang nasudlan og bakukang ang utok ni Baste dihang nibuhi kini og mahagitong mga pulong ngadto ni Duterte sa iyang podcast nga “Basta Dabawenyo” niadtong Hulyo 20, 2025.
Dili hinuon kini ikasurpresa kay init na man daan ang dugo ni Baste ngadto ni Torre, kinsa maoy nangulo sa pagdakop sa iyang amahan nga si kanhi Presidente Rodrido Duterte aron i-turn over sa International Criminal Court (ICC) sa The Hague, Netherlands kabahin sa kasong crime against humanity.
Nibukal og samot ang dugo ni Baste ngadto ni Torre dihang nag-assign kini og chief of police sa Davao City nga wala siya pahibaw-a.
Wala magdugay gikan sa paghagit ni Baste, nasudlan sab dayon og bakukang ang utok ni Torre dihang nisugot kini makigbinukbokay sa mas batan-ong Duterte unya himuon kining charity boxing match.
Tuod man, nagpahan-ay si Torre og daw usa ka lehitimong boxing promotion sa Rizal Memorial Coliseum niadtong Dominggo, Hulyo 27 diin libuan ka mga tawo ang nangabot. Aduna kini entrance fee ug adunay sponsors.
Matod pa ni Torre nga moabot o dili si Duterte, madayon ang kalihukan aron makakuha og pundo nga itabang sa mga nabiktima sa sunodsunod nga kalamidad nga niigo sa nasod ning bag-uhay lang.
Sama sa gilauman, wala’y Baste nga niabot ug gideklarar nga nidaog si Torre pinaagi sa default.
Apan ang tinud-anay nga ningdaog ning maong charity boxing match dili si Torre, kon dili ang mga biktima sa kalamidad, nga makadawat og kapin sa P20 million sa kinatibuk-an isip hinabang gikan ning maong talagsaong kalihukan.
Dalaygon sab gyud hinuon kining katuyoan ni Torre apan isip labing taas og ranggo sa kapulisan lukop nasod, puwede man unta siya makapasiugda og laing charity event nga dili siya mahimong… kataw-anan.