Sa wala pa molarga si kanhi Presidente Rodrigo Duterte sa Hong Kong niadtong Domnggo, siya namulong nga nasayod siya nga dunay arrest warrant gikan sa International Criminal Court (ICC) batok kaniya apan dason niya, iya kining atubangon.
Ang Presidential Communications Office (PSO) nikumpirmar sa pag-isyu sa arrest warrant. Sa usa ka pamahayag sa PCO, nagkanayon nga nadawat sa International Criminal Police Organization Manila (Interpol) ang kopya sa warrant of arrest ICC batok kang Duterte niadtong Martes sa kaadlawon, Marso 11, 2025.
Gi-serve sa mga opisyal sa Interpol Manila ang warrant of arrest sa pag-abot ni Duterte sa Manila gikan sa Hong Kong, alas 9:20 sa buntag niadtong Martes. Kini nagtapos sa hugonhugon human walay warrant nga gihuptan ang Philippine National Police (PNP).
Sa taho, si Duterte gidala sa Villamor Airbase. Gieskortan siya sa mga nag-unang opisyal sa pulisya.
Si Duterte ug kanhi hepe sa Philippine National Police nga karon si Senador Ronald dela Rosa giimbestigahan sa ICC tungod sa giingong krimen batok sa katawhan sa nasod gikan sa Nobiyembre 2011 hangtod Marso 2019 atol sa pagpatuman sa drug war sa naulahi sa Davao City ug unya sa tibuok nasod.
Ang kanhi hepe ehekutibo sa sayo pa niingon nga iyang giako ang hingpit nga responsibilidad sa mga pagpamatay nga nahimo sa panahon sa giyera sa druga.
Ang ICC nilunsad og imbestigasyon sa drug killings ubos ni Duterte gikan sa Nobiyembre 1, 2011, sa dihang siya pa ang mayor sa Davao City hangtod Marso 16, 2019, nga posibleng mga krimen batok sa katawhan.
Gi-withdraw ni Duterte ang Pilipinas niadtong 2019 gikan sa Rome Statute sa usa ka lakang nga giingon sa mga aktibista sa tawhanong katungod nga gitumong sa pag-ikyas sa tulubagon sa mga pagpatay.
Nagbasi sa The Hague, Netherlands, ang ICC mahimong moapil kon ang mga nasod dili gusto o dili makahimo sa pag-prosecute sa mga suspek sa labing makalilisang nga internasyonal nga mga krimen, lakip ang genocide, mga krimen sa gubat ug mga krimen batok sa katawhan.
Si Presidente Ferdinand Marcos Jr., nipuli kang Duterte niadtong 2022 ug nasiak ang ilang alyansa sa pulitika, nakahukom nga dili na moapil pag-usab sa ICC.
Apan ang administrasyong Marcos nag-ingon nga mokuoperar kini kon ang ICC mohangyo sa internasyonal nga polis nga dalhon si Duterte sa kustodiya pinaagi sa gitawag nga Red Notice, usa ka hangyo alang sa mga ahensiya nga nagpatuman sa balaod sa tibuok kalibutan.
Tataw nga dunay dakong bulok sa pulitika ang lakang sa administrasyon ni Marcos. Kini dunay epekto sa resulta sa Mayo 2025 midterm elections. Sa pagkakaron, dili masalikway nga dunay daghang dumadapig ang mga Duterte. Dili kaha?