Kon Dakbayan sa Mandaue ang hisgutan, pulos bantugan ang mga apelyido nga Ouano ug Cortes sukad pa kaniadto. Ang duha, parehong nahilakip sa labing impluwensyadong mga pamilya sa Mandaue nga giingong ikaunom sa labing adunahang mga dakbayan sa Pilipinas sa gawas sa Manila.
Sa natad sa politika, samot ang pagkabantugan ning maong mga apelyido nga managribal ug wala sukad nadungog nga nahimong kaalyado. Sa umaabot nga eleksyon sa Mayo, wala ikasurprisa nga Cortes batok Ouano na sab ang magtigi alang sa labing taas nga posisyon sa dakbayan – mayor.
Si dismissed Mayor Jonas Cortes mosuway pagbalik sa trono ubos sa partido nga Team Mandaue ug iyang ikaparang si Provincial Board Member Thadeo “Jonkie” Ouano ubos sa partido nga One Mandaue.
Gumikan sa hataas nga kasaysayan sa ilang pamilya sa pulitika, ang panagribal nila ni Cortes ug Ouano nahilakip sa gilista sa Commission of Elections (Comelec) nga kinahanglang bantayan og maayo aron malikayan ang posibleng kagubot.
Gani sa sayo pa lang, gipapirma sa Comelec og peace covenant ang duha ka mga kampo. Ang pagpirma sa peace covenant usa ka timailhan nga andam ang duha ka mga kampo nga ipatigbabaw ang hapsay, malinawon ug makiangayon nga eleksyon sa Mandaue.
Sa pagsugod sa campaign period alang sa lokal nga mga kandidato niadtong Biyernes, Marso 28, 2025, wala’y giusik nga panahon ang kampo ni Cortes ug nagpahigayon dayon kini og political rally pagkagabii ning maong adlaw.
Paglabay lang sa usa ka adlaw, nagpahigayon sab dayon og kaugalingong political rally ang kampo ni Ouano.
Wala may gikataho nga adunay nahitabo bisan gamay lang nga kasamok sa duha ka political rallies.
Mao sab kini ang nalantawang senaryo sa umaabot pa nga political rallies nga pasiugdahan sa matag habig sa umaabot pa nga mga adlaw.
Sa kasaysayan, wala man sab gyud hinuon nahitabong kasamok nga adunay kalambigitan sa eleksyon sa Mandaue, apan dili gihapon angayan nga molugak ang Comelec sa ilang bakus sa pagbantay sa kalinaw.
Aduna biya’y mga insidente kaniadto nga adunay nahitabong kasamok nga adunay kalambigitan sa politika sa ubang mga dapit sa nasod nga nadugkatan tungod sa panagbangi sa supporters sa managribal nga mga kandidato.
Hilabi na ning panahona, dili malikayan nga maglinabayay og mainitong mga mensahe sa social media ang supporters sa managribal nga mga kandidato nga makadugkat og kasamok.
Hinuon sa Mandaue, mura’g pareha lang seguro gihapon ang mahitabo sa ilang eleksyon – malinawon.