Maghilak ang adlaw nga way mangatikangkang sa mga dalan sa Metro Cebu. Sa 10 ka mga aksidente sa dalan, hayan naay 8-9 ang naglambigit og mga motorsiklo. Niadto lang Disyembre 25-26, diin tulo ang patay ug 9 ang nangaangol, sagad nangalambigit mga motorsiklo.
Hinuon wa nagpasabot nga sad-an ang mga nagmotorsiklo, apan duna say mga nagdanghag sa pagmaneho. Sagad sa mga motorsiklo nga nalambigit sa mga aksidente tungod sa counterflowing. Makaguol kay daghan na ang nangamatay niini.
Samot nga makaguol, kay ingon sa way kukahadlok ang mga nagmotorsiklo sa pag counterflow aron lang makalusot sa trapiko. Sa way paghuna-huna nga gawas nga sila posibleng maaksidente, makaangin sila sa laing mga tawo. Sila pa ang naghinanggaw sa karsada, sila pa ang nakaingon sa disgrasya.
Ang nakadasmag mao pay makabayad sa sala nga ang nakaingon ang driver nga reckless kun mapasagaron. Asa ka makakita og drivers nga mao pay masuko bisan kon sila pa ang sad-an?
Tungod kay gipasagdan sa mga otoridad ang kini nga buhat nga klarong kalapasan sa balaod sa trapiko, nagtuo na sila nga sakto ang ilang gibuhat. Dako kaayo ni nga sayop nga sa dugay nang panahon gipasagdan sa mga otoridad sa trapiko.
Sa mga dakbayan sa Sugbo, Mandaue ug Lapu-Lapu, naandan kaayo ni nga talan-awon sa karsada. Gipasagdan ang mga malapason kay nakasabot ang mga awtoridad kay nagdali padulong sa trabaho. Nagdali tingali padulong sa ospital o sementeryo.
Mahimo ra baya kaayo nga molusot sa daplin sa karsada nga buyon sa tukma ug sakto nga lane, wa kinahanglana nga mo-counterflow.
Hangtod nga pasagdan sa mga otoridad sa trapiko kini nga sayop nga buhat, magpabilin nga kuyaw ang atoang mga karsada sa mapasagaron nga mga drayber. Magpabilin nga gubot pa sa lukot ang kadalanan kay tuhiktuhik ug pinili lang ang mga dapit diin gipatuman nga estrikto ang mga balaod sa kadalanan.