Sa natad sa malungtaron nga pagdumala ug hustisya, ang tahas ug responsibilidad sa mga opisyal sa gobiyerno mao ang matinud-anon nga pag-alagad sa katungdanan ug ang paghimo og lakang nga nauyon sa balaudnon. Busa, ang kamanduan sa Office of the Ombudsman nga ipaubos sa preventive suspension si outgoing Dalaguete Mayor Ronald Allan Cesante, Vice Mayor William Lagahit, ug walo pa ka opisyal sa lungsod. Kini gihimo sa Office of the Ombudsman dili lang usa ka yano nga pamaagi, kondili usa ka aksiyon nga maghatag og katin-awan nga gikinahanglang ipatuman nga walay gipaboran, walay kahadlok, ug walay pagduhaduha. Anaa ang igong basehan sa maong kamanduan, ilabi na nga ang mga nahisgutang opisyal gipasanginlan sa grave abuse of authority, grave misconduct, dishonesty, ug conduct predujicial to the best interest of the service.
Ang maong pagpasuspenso may labot sa kontrobersiya sa giingong katukoran og bodega nga walay pagtugot, ang gikuwestiyon nga road repair ug concreting project nga nga mokantidad ngadto sa P9.65 milyunes, ang pagpahimulos sa mga kawani sa munisipyo ug kahimanan nga gigamit sa pagpatrabaho alang sa pribadong kontraktor, ug ang laing reklamo nga matod pa pagtangtang sa 1,800 ka senior citizens sa lista niadtong 2024 hinungdan nga wala na maapil sa makadawat og hinabang pinansyal.
Sa pikas bahin, ang mga reklamo gipasaka dili lamang tungod kay nasuko ang mga reklamante apan tungod kay aduna silay basehan ug nagsuporta nga dokumento. Importante ang kamatuoran nga ang Office of the Ombudsman, human makatukib og “sufficient grounds,” nihatag dayon og preventive suspension. Kini ang paagi aron dili makaimpluwensya ang mga akusado sa nagpadayong imbestigasyon nga makalihok nga malinawon ug dili malubog ang kamatuoran.
Sa katibuk-an, ang preventive suspension dili angayang isipon nga panimalos, kondili paagi lamang aron ang kamatuoran makab-ot, ang hustisya mobarog, ug mobalik ang pagsalig sa katawhan ngadto sa gobiyerno. Kon ang mga opisyal tinuod nga walay sala, ang hustisya ang magpamatuod niana. Apan ang kamatuoran kinahanglan una gayud mahubad, ug kana ang tuyo ning aksiyona.
Sa katapusan, ang Dalaguete ug ang mga lumulopyo niini ang nag-antos tungod sa kontrobersiya. Busa, ang hustisya, ang pagpatuman sa balaod ug ang kamatuoran mao ang bugtong paagi aron mabalik ang integridad ug serbisyo publiko.
Anaa ang atong panawagan: tugoti ang hustisya nga molihok ug ang kamatuoran ang mopatigbabaw.