Ang Cebu Bus Rapid Transit (CBRT) usa ka dako nga proyekto nga gipatuman sa Nasudnong Kagamhanan. Sa labing uwahi, sa kinatibuk-an ang proyekto gastuhan og mga P27 bilyunes.
Tuod, naa sa Dakbayan sa Sugbo ang proyekto apan way kasayuran ang Siyudad sa dagan niini tungod kay way coordinator. Matod ni Engr. Paul Villarete nga panahon ni kanhi mayor Tomas Osmeña siya ang gitudlo nga coordinator samtang panahon ni suspended Mayor Mike Rama, si Rafael Yap, nga kaniadto nangulo sa Cebu City Transportation Office (CCTO), mao ang gitudlo.
Gikinahanglan kaayo ang klaro nga coordinator alang ning mao nga proyekto. Ang gamay nga kasaypanan sa pagtukod sa proyekto, sama sa nakit-an sa Kapitolyo nga makaapekto sa view ang CBRT tungod sa bus stations, hayan di mahitabo.
Niadtong Sinulog 2024, wa na unta magsukarap sa pagpadali si Rama sa pagpalimpyo sa agianan sa mga nangapil sa prosesyon ug uban pang mga kalihukan sa Sinulog, apil na ang Sinulog sa Kabataan sa Lalawigan.
Ang papel sa coordinator mao ang mata ug dunggan sa Siyudad sa lakat sa proyekto. Mao usab kini ang mensahero sa Kagamhanan sa Siyudad kon unsa may ipadangat nga mensahe sa Nasudnong Kagamhanan, sama sa mga lakat ug kausaban.
Ang nahitabo man gud karon bisan kinsa na lang nga opisyal sa Siyudad ang makigsulti sa CBRT project manager. Way klaro nga tawo nga usa lang nga maoy modala sa tingog sa Siyudad o morepresentar niini sa mga tigom.
Sa kadako sa proyekto nga makaapekto sa kinabag-an sa mga taga Dakbayan sa Sugbo, ang panginahanglan sa coordinator dako kaayo. Kay mao ni ang magsilbe nga mga matag ug dunggan sa Siyudad. Kon unsa ang mahitabo sa CBRT, apektado kaayo ang mga taga Dakbayan sa Sugbo, adunahan man o ordinaryong tawo.
Hinaot pa nga si Acting Mayor Raymond Alvin Garcia makakita sa panginahanglan niini, mobutang siya og tawo nga kasaligan sa Siyudad.