Ang pamahayag ni Presidente Ferdinand “Bongbong” Marcos Jr. mahitungod niadtong 15 ka mga kompaniya sa construction nga nakadaog sa hapit tanang flood control projects sa nasod, nagpaila lang sa usa ka sistema nga nagtugot sa monopolyo sa dagkong government projects.
Sa tanang 9,855 ka proyekto gikan sa Hulyo 2022 hangtod Mayo 2025, ang kapin sa P100 bilyunes projects pabor ngadto sa pipila ra ka kompanya diin lima kanila ang adunay proyekto sa hapit sa tanang rehiyon.
Sa maong pinaagi, layo ang kahigayunan sa mga lokal nga kontraktor nga makatrabaho o makakuha sa mga proyekto sa kagamhanan.
Ang nakaayo kon local contractors mas dali ug personal nga koordinasyon. Apan, kon ang kontraktor usa ka “gi-import” nga gipaluyohan og impluwensiyado nga indibiduwal o opisyal, maguba ang hustisya sa kompetisyon.
Ang mas makapaduda mao ang kapin sa 6,000 ka proyekto nga walay klarong detalye sa klase sa estruktura ug igo lang gi-copy-paste nga disenyo ug kantidad bisan pa nga nagkalainlaing ang lugar o terrain.
Nganong gitugotan nga manghitabo ang sama nga kantidad ug disenyo sa lainlaing proyekto nga klaro nga adunay lahi nga teknikal nga panginahanglan?
Kini dili lamang teknikal nga kapakyasan, kondili usa ka hulagway sa posibleng kurapsyon nga naglubog sa tinuod nga katuyoan sa flood control.
Sa panahon nga ang publiko nagkinahanglan sa kasaligan ug transparent nga paggamit sa pundo.
Iyagyag ang kamatuoran apil na ang pagbulgar sa nagpaluyo sa mga gipaboran.
Kon mapamatud-an nga adunay kurapsiyon, i-ban ning mga kontraktor aron nga motagam.