Ang alegasyon batok ni Cebu City Mayor Raymond Alvin Garcia ug Department of the Interior and Local Government (DILG)7 Director Leocadio Trovela nga gisang-at ni Mikel Rama, nga nagkuwestiyon sa paghulip sa katungdanan sa nauna isip full-fledged mayor sa siyudad.
Si Mikel, anak ni dismissed Cebu City Mayor Michael Rama ang miduso og kasong grave misconduct, dishonesty, other fraud, refusal to discharge elective office ug abandonment of office or position ingon man falsification of public documents batok ni Garcia ngadto sa buhatan sa Ombudsman-Visayas niadtong Biyernes, Disyembre 6, 2024.
Base sa 13 ka pahina nga reklamo ni Rama giingong si Garcia sad-an sa kasong ‘other fraud’ ubos sa Article 214 in relation to Article 318 sa Revised Penal Code sa pasangil nga nipahimulos sa iyang posisyon kinsa padayon nga nangatungdanan isip mayor bisan nga walay legal nga basehanan.
Sa laing 11 ka pahina nga reklamo sa batan-ong Rama diin iyang gipasanginlan si Trovela og grave misconduct, dishonesty ug falsification of public documents.
Gitinguha sa reklamante nga kaisyuhan si Garcia sa anti-graft office og cease and desist order ug gitinguha niya nga ang mga gihinganlan nga respondents ipaubos sa preventive suspension.
IMBESTIGASYON
Sa maong kontrobersiya gikinahanglan nga ang buhatan sa Ombudsman mopahigayon og makuti ug ‘unbiased’ nga imbestigasyon kalabot sa maong kasungian. Ang resulta unya niini gikinahanglan nga magbase sa mga ebidensiya nga luwas sa bisan unsa nga bulok pamolitika ug public pressure.
Sa maong kaso nga nahitabo tali ni Rama ug Garcia gikinahanglan nga adunay check and balances tali ngadto sa local government units ug oversight agencies sama sa DILG aron dili na masubli ang maong kontrobersiya.
Samtang ang mga giakusahan ug ang mga reklamante kinahanglan mohatag og klaro ingon man transparent nga mga pagpasabot ang ipadangat ngadto sa publiko o Sugbuanon dungan sa pagtahod sa legal nga proseso.
Kinahanglan likayan sa mga stakeholder ang paggamit sa kaso alang sa politikal nga interes kay kini mao unyay hinungdan nga mawala o malawgaw na hinuon ang isyu ug motipas sa tinuoray nga hisgutanan mahitungod sa governance, accountability ug hustisya.