Editoryal: Good luck sa traffic

Editoryal: Good luck sa traffic
Editorial Cartoon by Ariel Itumay

Sa Biyernes, Disyembre 8, 2023, sugdan na ang hugna-hugna nga pagsirado sa trapiko sa Osmeña Blvd. sa dakbayan sa Sugbo tungod sa pagguba sa duha ka mga skywalk sa nagpadayong trabaho sa Cebu Bus Rapid Transit (CBRT) project.

Busa, good luck sa trapik. Segurado nga makaapekto kini sa ubang kadalanan tungod sa rerouting scheme sa Cebu City Traffic Office (CCTO). Gawas pa, naandan nga ning buwan sa Diyembre, mas mograbe ang trapiko tungod sa daghang mga kalihukan sa Pasko.

Hinuon, dili dungan sirad-an ang tibuok gitas-on sa Osmeña Blvd. sulod sa napulo ka adlaw. Himuon nga hugna-hugna kini. Unang gub-on mao ang skywalk nga duol sa Cebu Normal University ug isunod ang skywalk duol sa Fuente Osmeña.

Busa unang masira nga dalan karong Biyernes mao ang dapit sa CNU. Ang mga motorista nga mopadulong sa downtown o Colon area moliko sa wala sa dalan RR Landon ug moliko sa tuo sa dalan Junquera.

Sa unahan sa Junquera duol sa University of San Carlos padulong sa Colon, dunay night market nga moabli sa alas 6 sa gabii, panahon sa rush hours, diin ang dalan sa maong dapit usa na lang ka lane ang maagian sa sakyanan ug ang Colon nahimong one-way na lang.

Kay agianan kini sa daghang rota, busa trapik kaayo panahon sa night market, masamutan pa sa rerouting tungod sa CBRT project. Wala ba kahay himuon nga adjustment ang night market?

Sa pakighinabi sa online commentary program sa SunStar Cebu nga ‘Beyond The Headlines’, Martes, Disyembre 4, 2023, kang Maria Pino, presidente sa Cebu City United Vendors Association (CCUVA) nga nagpasiugda sa night market, nipadayag kini nga wala pa siya nasayod sa rerouting plan.

Tulo na lang ka adlaw sa dili pa ang rerouting, ang CCTO wala pa mopahibalo sa tagdumala sa night market?

Hinuon, si Pino niingon nga motuman sa mando sa CCTO alang sa kahusay sa trapiko ug kaayuhan sa publiko. Apan panagana na lang mo daan mga vendor sa posibling adjustments. Good luck usab sa publiko.

Kon mahimo likay una sa dapit nga dunay CBRT project. Magbalon og taas nga pasensiya. Maglikay sa road rage kay hasol na.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph