Human sa daghang mga reklamo sa netizens sa pagbukas og u-turn slot sa Cebu South Coastal Road (CSCR) tungod kay kuyaw ug nakamugna na hinuon og kahuot sa trapiko, si Cebu City Mayor Michael Rama duna nay tubag niini. Nipasabot ang mayor nga alang ni sa pagdaginot sa gasolina kay layo pa ang u-turn slot nga naa sa utlanan tali sa Cebu City ug Talisay.
Layo diay nang mga 500 metros? Pila may imong madaginot nga gasolina nianang mao nga gilay-on?
Matod ni Engr. Paul Villarete, usa ka urban planner, ang CSCR usa ka expressway, busa ang karsada gidesinyo nga way mga eskina aron makalahoslahos ang mga sakyanan. Ang tumong niini mao ang paspas nga dagan sa mga sakyanan nga molagbas sa mao nga karsada. Mao gani nga giila kini og expressway.
Ikaduha, tungod kay kusog ang dagan sa mga sakyanan, kuyaw kini sa mga disgrasya kay duna ra bay mga drayber nga di magpakabana sa pagtan-aw kon duna bay nagdulong nga sakyanan. Ang ubang mga sakyanan maoy palihayon.
Bisan unsaon pag tan-aw, kon sakyan ta man gani ang argumento sa mayor, mabaw ra kaayo kini nga katarungan kon itandi sa gihatag nga kahasol ug kakuyaw nianang u-turn slot.
Di lang kay sa CSCR iyang gipang-usab ang mga karsada nga gibutangan og mga obstacle alang sa kaluwasan sa mga motorista ug pedestrian. Dunay uban nga ang mga istruktura iyang gipatangtang aron moluag ang trapiko.
Ang mao nga mga barrier gituyo sa pagbutang sa mao nga mga karsada isip proteksyon. Wa kini gibutang aron mapanindot ang karsada. Nakita sa mga engineer sa Dept. of Public Works and Highways (DPWH) ang panginahanglan sa pagbutang og “islands” sa pipila ka mga national highway sa Cebu City alang sa kaluwasan sa mga motorista.
Mao gani nga nanghunaw na ang DPWH sa dihang gisugdan sa pagpaguba sa mayor ang mao nga mga istruktura. Giingon nga duna na kini pagtugot sa mao nga ahensya apan sa pamahayag sa national agency, ingon sa di kini tinuod.
Nasayod ba kaha ang mayor sa kadaghan sa “kamote drivers” dinhi sa dakbayan sa Sugbo nga hilig kaayo sa counterflow? Kon tangtangon kini nga mga barrier, nagbutang kini sa kakuyaw sa mga motorista gikan sa abusado nga mga driver nga way paghuna-huna sa kaluwasan sa uban.
Bisan unsa pa, way katumbas ang kinabuhi sa tawo.